ملتان : ملتان سے اغوا کے بعد بازیاب ہونے والے بچے نقیب اللّٰہ کے والد نے کہا ہے کہ ان کے بیٹے کو اسٹیج اداکارہ آئمہ خان نے اغوا کروایا۔نقیب اللّٰہ کے والد نواز خان نے پریس کانفرنس کرتے ہوئے کہا کہ میرا بیٹا آئمہ خان کے گھر سے ملا ہے۔والد نواز خان نے کہا کہ پولیس نے بروقت کارروائی کی اور مدد کی، آئمہ خان کی ضمانت کے خلاف رٹ دائر کریں گے۔ نواز خان نے کہا کہ آئمہ خان خود کو بیگناہ ظاہر کرنے کے لیے ڈرامہ کر رہی ہیں۔واضح رہے کہ ڈیڑھ سالہ بچے کے اغواء کے الزام میں پولیس نے اسٹیج اداکارہ آئمہ خان اور ان کے شوہر کو گرفتار کیا تھا۔پولیس کا کہنا تھا کہ اسٹیج اداکارہ آئمہ خان کے گھر پر چھاپہ مار کر مغوی بچے کو بازیاب کرلیا گیا۔پولیس کے مطابق آئمہ خان کی 4 سال قبل شادی ہوئی تھی، ان کی کوئی اولاد نہیں تھی، شوہر کے ساتھ مل کر بچے کو اغواء کیا تھا۔پولیس کا کہنا تھا کہ ڈیڑھ سالہ بچہ دو دن قبل نواحی علاقے کڑی جمنداں سے اغواء کیا گیا تھا۔
