لاہور : چئیرمین پاکستان کرکٹ بورڈ رمیز راجہ نے کہا ہے کہ پاکستان ٹیم نمبر ون نہیں بنتی تو چیئرمین سمیت سب فلاپ ہیں۔ قذافی سٹیڈیم ،لاہور سے چیئرمین پی سی بی رمیز راجہ نے شائقینِ کرکٹ کے لیے خصوصی پیغام جاری کیا۔ رمیز راجہ نے کہا کہ میں مداحوں کی اہمیت کو سمجھتا ہوں کیوں کہ کرکٹر کو اس کے چاہنے والے ہی بڑا بناتے ہیں۔ انہوں نے مزید کہا کہ فینز کو اب جیت کی امید ہے لہٰذا ہمیں فینز کی توقعات کے مطابق ٹیم بنانی ہے۔ واضح رہے کہ ٹی ٹونٹی ورلڈ کپ کا دوسرا سیمی فائنل آج ناقابل شکست پاکستان اور آسٹریلیا کے درمیان دبئی میں کھیلا جائے گا۔ میچ پاکستانی وقت کے مطابق شام 7 بجے شروع ہوگا۔ یاد رہے کہ نیوزی لینڈ کی ٹیم پہلے ہی فائنل کے لیے کوالیفائی کرچکی ہے ۔
