صنعاء یمن میں آئینی حکومت کی عمل داری کی بحالی کیلئے سعودی عرب کی قیادت میں قائم عرب فوجی اتحاد نے حوثی باغیوں کی جانب سے الریاض کے شاہ خالد ہوائی اڈے پر حملے کے دعوے کو بے بنیاد قرار دیدیا۔غیر ملکی میڈیا کے مطابق عرب فوجی اتحاد کے ترجمان کرنل ترکی المالکی نے ایک بیان
میں کہا کہ بعض ذرائع ابلاغ میں من گھڑت افواہیں شائع ہوئی ہے کہ یمن کے ایرانی حمایت یافتہ حوثی باغیوں نے سعودی دارالحکومت الریاض کے شاہ خالد بین الاقوامی ہوائی اڈے پر حملہ کیا ہے۔ان کا کہنا تھا کہ حوثیوں کی طرف سے شاہ خالد ہوائی اڈے کو نشانہ بنائے جانے کا دعوی بے بنیاد ہے تاہم ایران نواز یمنی باغیوں نے ایک بیلسٹک میزائل داغا جو صحرا میں ویران علاقے میں گرا ہے۔کرنل المالکی نے کہا کہ ایرانی حمایت یافتہ حوثی دہشت گرد ذرائع ابلاغ کے ذریعے شہری تنصیبات اور شہریوں کو نشانہ بنائے جانے کے اپنے جرائم کا خود ہی اعتراف کررہے ہیں۔ حوثیوں کی طرف سے یمن کے اندر اور سرحد پار کارروائیاں عالمی قوانین کی خلاف ورزی اور انسانی حقوق کی سنگین پامالیاں ہیں۔
