کراچی: پاکستان سپر لیگ کے پانچویں میچ میں اسلام آباد یونائیٹڈ نے پشاور زلمی کو 9 وکٹوں سے باآسانی شکست دے کر ایونٹ میں فاتحانہ آغاز کردیا۔ کراچی کے نیشنل اسٹیڈیم میں ایچ بی ایل پی ایس ایل کا پانچواں میچ پشاور زلمی اور اسلام آباد یونائیٹڈ کی ٹیموں کے مابین کھیلا گیا، جس میں پشاور زلمی نے پہلے بیٹنگ کرتے ہوئے اسلام آباد یونائیٹڈ کو جیت کے لیے 169 رنز کا ہدف دیا۔ اسلام آباد یونائیٹڈ کے پال اسٹرلنگ اور الیکس ہیلز نے ہدف کے تعاقب اننگز کا آغاز کیا اور جارحانہ بلے بازی کرتے ہوئے پشاور زلمی کے بالروں پر خوب لاٹھی چارج کیا اور ان کی ایک نہ چلنے دی۔ اوپنرز نے 112 رنز کی شراکت داری قائم کی، بعد ازاں پال اسٹرلنگ 57 کے انفرادی اسکور پر رن آؤٹ ہوکر پویلین روانہ ہوئے۔ انہوں نے 25 گیندوں پر 3 چھکوں اور 7 چوکوں کی مدد سے 57 رنز کی شاندار اننگز کھیلی۔ دوسرے اینڈ پر ہیلز نے اسی دوران 33 گیندوں پر ایک چھکے اور 8 چوکوں کی مدد سے نصف سنچری اسکور کی،
اسٹرلنگ کے بعد اُن کا وکٹ پر ساتھ دینے کے لیے رحمان اللہ آئے، جنہوں نے میچ کو اختتام پر پہنچایا۔ ایلکس ہیلز نے 82 رنز کی ناقابل شکست اننگز کھیل کر ٹیم کی جیت میں اہم کردار ادا کیا۔ اسلام آباد یونانئِتڈ نے 169 رنز کا ہدف 16 ویں اوور میں ایک وکٹ کے نقصان پر باآسانی حاصل کیا۔ اس سے قبل اسلام آباد یونائیٹڈ نے پشاور زلمی کے خلاف ٹاس جیت کے فیلڈنگ کا فیصلہ کیا اور پشاور زلمی کو بیٹنگ کی دعوت دی۔ پشاور زلمی اننگز پشاور زلمی کی جانب سے ٹام کوہلر اور یاسر خان نے اننگز کا آغاز کیا تاہم ٹام کوہلر کھاتہ کھولے بغیر ہی صفر پر آؤٹ ہو گئے۔ جس کے بعد حیدر علی آئے اور یاسر خان کے ساتھ مل کر اسکور بورڈ کو آگے بڑھایا تاہم 26 کے مجموعی اسکور پر یاسر خان بھی 14 رنز بنا کر شاداب خان کے ہاتھوں کیچ آؤٹ ہوئے جب کہ نئے آنے والے بیٹسمین حسین طلعت بھی صرف 2 رنز کے مہمان ثابت ہوئے۔حیدر علی بھی 15 رنز بنانے کے بعد اسلام آباد یونائیٹڈ کے کپتان شاداب خان کا شکار بنے۔ جب پشاور زلمی کی بیٹنگ لائن بری طرح لڑکھڑا گئی تب شعیب ملک نے شرفانے ردرفورڈ کے ساتھ مل کر محتاط انداز اپناتے ہوئے اسکور بورڈ کو آگے بڑھایا لیکن شعیب ملک بھی 25 رنز پر محمد وسیم کے ہاتھوں آؤٹ ہوگئے۔نئے آنے والے بیٹسمین بین کٹنگ بھی 26 رنز پر حسن علی کی گیند پر آؤٹ ہوئے جب کہ شرفانے ردرفورڈ نے جارحانہ انداز اپناتے ہوئے شاندار 70 رنز بنائے یوں پشاور زلمی نے تمام اوورز کھیلتے ہوئے 168 رنز اسکور کیے اور اسلام آباد یونائیٹڈ کو کو فتح کے لیے 169 رنز کا ہدف دے دیا۔پشاور زلمی کی جانب سے شرفانے ردرفورڈ سب سے زیادہ 70 رنز بنا کر نمایاں رہے جب کہ اسلام آباد یونائیٹڈ کی جانب سے حسن علی اور فہیم اشرف نے 2، 2 جب کہ محمد وسیم اور شاداب خان نے ایک ایک وکٹ حاصل کی۔
سینئرز پہلے کھانا کیوں کھاتے ہیں، پاکستان ملٹری اکیڈمی کی کچھ ایسی باتیں جو اکثر لوگ جاننا چاہتے ہیں
