لاہور : نیشنل کمانڈ اینڈ آپریشن سنٹر (این سی او سی) نے پاکستان کرکٹ بورڈ (پی سی بی) کو پاکستان سپر لیگ (پی ایس ایل) سیزن 6 کے بقیہ میچز کو کراچی سے منتقل کرنے کی تجویز دی ہے۔ پی ایس ایل حکام نے این سی او سی سے ملاقات کی اور ملک میں کوویڈ 19 کے حالیہ اضافے کے دوران کراچی میں میچز کے انعقاد کے منصوبے کے بارے میں بریفنگ دی۔ این سی او سی پی ایس ایل کے عہدیداروں کی بریفنگ سے مطمئن نہیں ہے ، لہذا این سی او سی نے لیگ کے عہدیداروں سے کہا کہ باقی میچز کو متحدہ عرب امارات میں منتقل کریں کیوں کہ ملک بھر میں COVID-19 ہاٹ سپاٹ علاقوں میں لاک ڈاؤن ہو رہے ہیں۔
پی ایس ایل کے عہدیداروں نے کراچی میں میچوں کے انعقاد کی اجازت دینے پر راضی کرنے کی کوشش کی تاہم دونوں فریقوں کے مابین تعطل رہا۔ بقیہ میچ کراچی یا متحدہ عرب امارات میں کرانے کا حتمی فیصلہ عید الفطر کے بعد لیا جائے گا۔ یاد رہے کہ پی ایس ایل 6 کا فی الحال یکم جون سے نیشنل سٹیڈیم میں دوبارہ آغاز ہونا ہے ، ٹیموں کو 23 مئی سے لازمی طور پر7 روزہ قرنطینہ اختیار کرنا ہے۔
