لاہور : پاکستان کرکٹ بورڈ (پی سی بی) کے چیف ایگزیکٹو وسیم خان کا کہنا ہے کہ اب سکیورٹی نہیں بلکہ کوویڈ19 بڑا مسئلہ ہے۔ لاہور میں میڈیا سے گفتگو میں 49 سالہ وسیم خان نے کہا کہ جنوبی افریقی کرکٹ ٹیم کے پاکستان آنے پر شکر گزار ہیں، یہ سیریز انتہائی کامیاب رہی۔ انہوں نے کہا کہ اپریل میں پاکستانی ٹیم کو جنوبی افریقہ کے دورے پر جانا ہے، ہم وہاں کی صورت حال مانیٹر کر رہے ہیں، پی ایس ایل شروع ہونے دیں پھر سب ٹھیک ہوجائے گا۔
انہوں نے کہا کہ آسٹریلیا کی ٹیم اگلے برس مکمل سیریز کے لیے پاکستان آئے گی، ملک میں اب سکیورٹی کا ایشو نہیں رہا بلکہ کوویڈ 19 بڑا مسئلہ ہے۔ وسیم خان کا مزید کہنا تھا کہ پی ایس ایل کی تیاریاں زور و شور سے جاری ہیں ،ٹکٹوں کی فروخت پیر سے شروع ہو جائے گی۔ ان کا کہنا تھا کہ آئی سی سی کے ایونٹس کا فیصلہ اکتوبر، نومبر تک ہو گا۔ پی سی بی سی ای او نے مزید کہا کہ کھلاڑیوں کو خود ذمہ داریاں نبھانی چاہیے، ریجنز کی کمیٹیوں کا اعلان جلد کردیا جائے گا، گورننگ بورڈ کا اجلاس 27 فروری کو کراچی میں شیڈول ہے۔
