اسلام آباد : موبائل فون وطن لانے والوں سے وصول شدہ اضافی رقم واپس دینے کا فیصلہ کیا گیا ہے۔تفصیلات کے مطابق موبائل فون وطن لانے والوں سے وصول شدہ اضافی رقم واپس دینے کا فیصلہ کیا گیا ہے۔ایف بی آر نے موبائل فونز پر عائد کسٹمز ڈیوٹی کے حوالے سے باضابطہ وضاحت جاری کرتے ہوئے کہا ہے کہ وی بوک سسٹم میں تبدیلی کے دوران غلطی سے کسٹم ڈیوٹی میں اضافہ ہوا جس پر متاثرہ افراد سے معذرت خواہ ہیں انہیں اضافی رقم واپس کی جائے گی۔ ایف بی آر کی وضاحت میں کہا گیا ہے کہ پی ٹی اے کے ساتھ ہونے والی میٹنگ میں علم ہوا کہ غیرملکی مسافر اپنے پاسپورٹ پر پانچ موبائل فون رجسٹر کر سکتے ہیں۔

بتایا گیا ہے کہ 500 امریکی ڈالر سے زائد مالیت کے فون پر عائد کسٹمز ڈیوٹی و ٹیکسز ادائیگی کا پاسپورٹ اور شناختی کارڈ کے ذریعے رجسٹریشن میں فرق تقریبا” 9000 روپے ہے۔ اس فرق کو ختم کرنے اور پاسپورٹ کے ذریعے رجسٹریشن کے تحت صرف ایک فون کی اجازت کے لئے وی بوک موڈیول میں تبدیلی کی جارہی تھی۔ اس پراسیس کے دوران تکنیکی خرابی کی وجہ سے ودہولڈنگ ٹیکس کی چھوٹ سسٹم سے خارج ہو گئی جس کی وجہ سے پاسپورٹ پر فون رجسٹریشن پر 36720 روپے کسٹمز ڈیوٹی چارج ہونے لگی۔ اس مسئلے کے فوری حل کی کوشش جاری ہے اور تکنیکی ٹیم وی بوک موڈیول کو جانچ پڑتال کر رہی ہے اور عائد ڈیوٹیز اور ٹیکسز کی درستگی کر رہی ہے۔ بتایا گیا ہے کہ کل تک اس مسئلے کو ٹھیک کر لیا جائے گا۔ اس تکنیکی خرابی کی وجہ سے جن افراد سے زائد ڈیوٹیز و ٹیکسز لئے گئے ہیں، ان کو زائد ادا شدہ رقم فی الفور ریفنڈ کر دی جائے گی۔ ایف بی آر اس خرابی کی وجہ سے ان کو پیش آ نے والی مشکل پر معذرت خواہ ہے۔