لاہور : مفخر عدیل نے اپنی اہلیہ پر ناجائز تعلقات استوار کرنے کا الزام عائد کر دیا، گرفتار ایس ایس پی لاہور نے پولیس کو دیے بیان میں انکشاف کیا کہ دوست شہباز تتلہ اور اس کی اہلیہ نے تعلقات استوار کر رکھے تھے۔ تفصیلات کے مطابق ایک ماہ مفرور رہنے کے بعد گرفتاری دے دینے والے پنجاب پولیس کے ایس ایس پی مفخر عدیل نے دوران تفتیش پولیس کو دیے بیان میں تہلکہ خیز انکشافات کیا ہے۔ مفخر عدیل کا کہنا اس کی اہلیہ غیر اخلاقی سرگرمیوں میں ملوث رہی۔ ایس ایس پی مفخر عدیل نے اعترافی بیان میں شہباز تتلہ کے قتل کا اعتراف بھی کر لیا ہے۔ انوسٹی گیشن سیل میں مفخر عدیل کو پہلے سے گرفتار ملزم اسد بھٹی کے سامنے بیٹھا کر تفتیش کی گئی جہاں اس نے اپنے دوست اسد بھٹی کے ساتھ مل کر شہباز تتلہ کو قتل کرنے کا اعتراف کر لیا۔

مفخر عدیل نے کہا کہ میرا دوست اگر میری بیوی سے تعلقات رکھے گا تو واجب القتل ہے۔ شہباز تتلہ کو کئی بار منع کیا گیا کہ بیوی سے تعلقات نہ رکھو تاہم اس نے میری بات نہ مانی جس پر اس کے قتل کا منصوبہ تیار کیا۔ مزید بتایا گیا ہے کہ مفخر عدیل شہباز تتلہ کیساتھ مبینہ ناجائز تعلقات استوار کرنے والی اہلیہ کو طلاق دے چکا ہے۔ اس تمام معاملے کے حوالے سے پولیس کا بتانا ہے کہ ملزم ایس ایس پی مفخر عدیل نے بیرون ملک فرار ہونے کی کوشش بھی کی تاہم ناکام رہا۔
بیرون ملک فرار ہونے کی تمام تر ناکام کوششوں کے بعد ملزم مفخر عدیل نے خود کو پولیس کے حوالے کر دیا ۔ مفخر عدیل پر اپنے دوست شہباز تتلہ کو قتل کرنے اور قتل کے تمام شواہد مٹا دینے کا الزام ہے۔ ملزم ایک ماہ سے مفرور تھا، جبکہ پولیس تاحال اس کے مقتول دوست شہباز تتلہ کی لاش تلاش کرنے میں ناکام رہی ہے۔

News Source:Urdu Point webpage