اسلام آباد (مانیٹرنگ ڈیسک) پاکستان تحریک انصاف نے گزشتہ روز قومی اسمبلی کے سینکڑوں امیدواروں کو پارٹی ٹکٹ جاری کر دیے ہیں۔ تاہم چند اہم رہنمائوں کو پارٹی ٹکٹ نہ دیے جانے پر عوامی حلقوں اور میڈیا پر قیاس آرائیوں کا سلسلہ جاری ہے ۔ انھی اہم شخصیات میں علی محمد خان بھی شامل ہیں ۔ اس بارے میں ایک نجی ٹی وی چینل نے حیران کن دعویٰ
کیا ہے۔ نجی ٹی وی جیونیوز نے اپنے ذرائع کے حوالے سے کہاہے کہ مردان سے پاکستان تحریک انصاف کے امیدوار علی محمد خان کی 5 سالہ کارکردگی سے پارٹی قیادت مطمئن نہ ہوسکی۔ علی محمد خان کو ٹکٹ دینے کا فیصلہ کارکنوں کی رائے سے مشروط کر دیا گیا ہے اور انہیں کارکنوں اور حلقے کے عوام کی آراءسامنے آنے کے بعد ٹکٹ دینے یا نہ دینا کا فیصلہ کیا جائے گا۔اس حوالے سے پارٹی قیادت سروے رپورٹ موصول ہونے کے بعد حتمی فیصلہ کیا جائے گا۔کراچی سے فیصل واوڈا کو بھی تاحال ٹکٹ نہیں مل سکا ہے جب کہ عامر لیاقت حسین کو بھی ٹکٹ جاری نہیں کیا گیا۔ کراچی کے امیدواروں کو ٹکٹ جاری کرنے سے متعلق فیصلہ 13 جون کو پارلیمانی بورڈ کے اجلاس میں ہوگا۔