اسلام آباد : وزیراعظم عمران خان نے کہا ہے کہ یہ ڈیموکریٹک موومنٹ نہیں، چوری بچاؤ موومنٹ ہے،پی ڈی ایم چوروں کا ٹولہ ہے، اپوزیشن ارکان خرید کراکثریت حاصل کرنا چاہتی، لیکن اکثریت ہماری ہوگی، خفیہ ووٹنگ پر یہ روئیں گے۔انہوں نے نجی ٹی وی سے خصوصی انٹرویو میں کہا کہ سب کو پتا ہے 30سالوں سے سب کو پتا ہے سینیٹ الیکشن میں پیسا چلتا ہے۔ ہمیں پتا چل گیا سینیٹ الیکشن میں بولیاں لگ گئی ہیں،سیٹ بیچنے کاپیسا سربراہان تک جاتا ہے، سینیٹ الیکشن میں 50 کروڑ سے 70 کروڑ قیمت لگ گئی ہے،

ایسے لوگ جن کے ہاتھ میں ملک کا مستقبل ہے، جب وہ لوگ جو اپنے ضمیر بیچ کر فیصلے کریں گے، تو پھر ہم پٹواریوں اور تھانیداروں کو کیسے روکیں گے؟ ضمیر بیچنے سے سیاستدانوں اورسیاست کی کیااہمیت رہ جائے گی؟ویڈیو پہلے ہوتی تو سپریم کورٹ میں بطور ثبوت پیش کردیتے، مسئلہ ویڈیو کی ٹائمنگ کا نہیں ارکان کی خریدوفروخت کا ہے ہم نے ویڈیو کے معاملے پرکمیٹی بنا دی ہے، کمیٹی نام سامنے آنے والوں کی تحقیقات کرے گی، انکوائری کیلئے ایف آئی اے کو استعمال کریں ، الیکشن کمیشن کو سفارشات بھجوائی جائیں گی۔ انہوں نے کہا کہ 2013ء میں ہماری حکومت کے پی میں آئی، پہلے سینیٹ الیکشن میں بھی میرا بیان ہے، ارکان اسمبلی کو قیمتیں لگ گئی ہیں، میں اپنے ارکان کو خبردار بھی کیا تھا، پھر2018ء کے الیکشن میں ہم نے اپنے ارکان کو شوکاز نوٹس بھیجے اور انکوائری کرکے 20 ارکان کو فارغ کردیا تھا۔ہمیں خفیہ ووٹنگ سے کوئی ڈر نہیں،پچھلی باری کی طرح اپوزیشن روئے گی، خفیہ ووٹنگ میں ہمیشہ حکومت کو فائدہ ہوتا ہے۔ حکومت کو زیادہ سیٹیں ملتی ہیں۔انہوں نے کہا کہ روپے کی قدر کم ہونے سے مہنگائی بڑھتی ہے، ڈالر مہنگاہوتا ہے تو ساری چیزیں مہنگی ہوجاتی ہیں، تنخواہ دار طبقہ متاثر ہوتا ہے۔ اگر ملازمین کی تنخواہیں بڑھائیں تو ہمارا خسارہ بڑھ جائے گا، اور مہنگائی میں بھی اضافہ ہوجائے گا، اس لیے سرکاری ملازمین کو صبر کرنا چاہیے، سرکاری ملازمین پہلے 20فیصد پر مان گئے تھے لیکن بعد میں ایک مطالبہ اور بڑھا دیا۔انہوں نے کہا کہ پی ڈی ایم چوروں کا ٹولہ ہے، یہ ڈیموکریٹک موومنٹ نہیں چوری بچاؤ موومنٹ ہے۔اپوزیشن چاہتی ہے ان کو کیسز پر این آراو مل جائے جو ان کو نہیں ملے گا۔