اسلام آباد: وزارت خارجہ نے بیرون ممالک پھنسے پاکستانیوں کو واپس لانے کا شیڈول جاری کردیا ہے، جس کے تحت پاکستانیوں کو واپس لانے کیلئے20 تا 28 اپریل پی آئی اے کی خصوصی پروازیں چلائی جائیں گی،ان پروازوں سے متحدہ عرب امارات، دبئی، سنگاپور، ملائیشیاء، آسٹریلیا، برطانیہ دیگر ممالک سے پاکستانیوں کو واپس لایا جائےگا۔ ترجمان وزارت خارجہ کا کہنا ہے کہ بیرون ممالک پھنسے پاکستانیوں کو وطن واپس لانے کا تیسرا مرحلہ کل سے شروع ہوگا۔ 20 سے 28 اپریل تک20 خصوصی پروازوں سے مختلف ممالک سے پاکستانیوں کو وطن واپس لایا جائے گا۔ شیڈول کے مطابق 20 اپریل کوجنوبی افریقہ، متحدہ عرب امارات، بحرین سے پاکستانیوں کو واپس لایا جائے گا۔
23 اپریل کو کوریا سے پاکستانیوں کو واپس لایا جائےگا۔24 اپریل کوملائشیا، سنگاپور، برطانیہ، متحدہ عرب امارات سے پاکستانیوں کولایا جائے گا۔ 26 اپریل کو آسٹریلیا اور28 اپریل کو متحدہ عرب امارات سے خصوصی پروازوں سے پھنسے پاکستانیوں کو واپس لایا جائے گا۔ اسی طرح ذرائع کا کہنا ہے کہ مسافروں کو دبئی سے لانے کیلئے ایک طیارہ لاہورسے بھیجا جائےگا۔ دبئی سے پروازپی کے204 شام 5 بجے250 مسافروں کو لاہور لائےگی۔ دوسری پرواز پی کے 8702 رات 10بجے 250 مسافروں کو لے کر لاہورآئے گی۔ پی آئی اے دونوں خصوصی پروازوں کے لیے777 طیارے استعمال کرے گا۔ اسی طرح پی آئی اے کا بیرون ملک پھنسے ہوئے ہم وطنوں کو وطن واپس پہنچانے کیلئے فلائٹ آپریشن کا سلسلہ جاری ہے۔ پی آئی اے کی خصوصی پروازوں کے ذریعے 2400 سے زائد ہم وطنوں کو واپس وطن لایا گیا۔پی آئی اے ترجمان کے مطابق پی آئی اے کی خصوصی پروازوں کے ذریعے چوبیس سو سے زائد پاکستانیوں کو وطن پہنچایا جاچکا ہے، بیرون ملک سے وطن پہنچنے والے پاکستانیوں کے ایئرپورٹ پر جذباتی مناظر بھی دیکھنے میں آئے۔
عالمی وبا کی وجہ سے وطن سے دور رہنے والے پاکستانیوں کی ملک سے محبت اور عقیدت کا اظہار بھی اپنی جگہ خاص حیثیت رکھتا ہے، یہ نظارے ملک کے مختلف ایئرپورٹس پر اس وقت دیکھنے میں آئے جب ہم وطنوں کی وطن واپسی ممکن ہوئی۔ پی آئی اے قومی فریضہ ادا کرتے ہوئے 27خصوصی پروازوں کے ذریعے 2400 سے زائد ہم وطنوں کو پہنچایا گیا ہے اور مزید واپسی کا سلسلہ جاری رکھے ہوئے ہے۔پی آئی اے نے برطانیہ، انڈونیشیا کے شہر جکارتہ، دبئی، ترکی سمیت دیگر ممالک سے ہم وطنوں کو واپس پہنچایا ہے۔ پی آئی اے انتظامیہ کے مطابق پی آئی اے کا عملہ اس وقت مشکل وقت میں بہادری سے خدمات سر انجام دے رہا ہے۔
