ریاض(مانیٹرنگ ڈیسک) سعودی عرب اور ایرا ن کے حمایت یافتہ حوثی باغیوں کے مابین جنگ جاری ہے اور فریقین ایک دوسرے پر شدید حملے کررہے ہیں اتحادی افواج کے ترجمان نے کہا ہے کہ مغربی ساحل پر اتحادی افواج کے طیاروں نے متعدد حملے کرکے حوثی ملیشیا کے 40جنگجوئوں کو ہلاک کردیاجبکہ دھماکہ خیز مواد لیجانے والی حوثی باغیوں کی 2کشتیاں یمن کے مغربی ساحل پر تباہ کردی گئیں۔ غیرملکی خبررساں ادارے کے مطابق حوثی باغیوں نے 2کشتیوں کے ذریعے بحیرہ احمر میں بین الاقوامی گزر گاہ کو نشانہ بنانے کی کوشش کی۔ اطلاع ملنے پر اتحادی افوا ج کے طیاروں نے بروقت کارروائی کرکے کشتیو ں کو تباہ کردیا۔ انہوں نے کہاکہ مغربی ساحل پر اتحادی افواج کے طیاروں نے متعدد حملے کرکے حوثی ملیشیا

کے 40جنگجوئوں کو ہلاک کردیا۔ کارروائی کا نشانہ باجل ، الجراحی اور الجبانہ کمشنریاں تھیں۔ انہوں نے کہا کہ حوثی ملیشیا کی مسلسل کوشش ہے کہ بحیرہ احمر میں بین الاقوامی گزر گاہ کو نشانہ بنایا جائے۔ یہ علاقہ بین الاقوامی تجارت کی اہم گزر گاہ ہے جہاں سے دنیا کے12فیصد بحری بیڑے گزرتے ہیں۔