ورلڈ کپ میچ نہ کھیل کر بھارت پاکستان کا کیا بگاڑ لے گا پاکستان کو نقصان پہنچانا ہے تو یہ کام کرو سابق کپتان سنیل گواسکر نے بھارت کو مشورہ دے ڈالا

نئی دہلی(آئی این پی)بھارتی لیجنڈ کرکٹر سنیل گواسکر نے کہا ہے کہ پاکستان کے خلاف ورلڈ کپ میں نہ کھیلنے سے نقصان صرف بھارت کا ہی ہوگا۔ٹائمز آف انڈیا کی رپورٹ کے مطابق بھارتی چینل پر انٹرویو دیتے ہوئے سنیل گواسکر نے کہاکہ عالمی مقابلے میں بھارت کے ساتھ نہ کھیلنے سے نقصان ہوگا۔جب پروگرام اینکر کی جانب سے سوال کیا گیا تو بھارت کے

سابق کپتان نے کہا کہ اگر میں آج بھارتی ٹیم میں ہوتا تو ورلڈکپ میں پاکستان کے خلاف میچ لازمی کھیلتا۔اپنی بات کو جاری رکھتے ہوئے سنیل گواسکر نے کہا کہ میرا کھیلنے کا مقصد خالی میچ کھیلنا نہیں ہے بلکہ میچ میں حریف ٹیم کو شکست دے کر اسے ان 2 پوائنٹس سے محروم کرنا ہے جو اسے بغیر کھیلے ملیں گے۔سابق بھارتی کپتان نے کہا کہ بھارت کے نہ کھیلنے کی وجہ سے پاکستان کو اہم 2 پوائنٹس مل جائیں گے جس سے نقصان صرف بھارت کا ہوگا اور پاکستان کی ممکنہ طور پر سیمی فائنل اور پھر فائنل تک رسائی ممکن ہوجائے گی۔دوسری جانب سنیل گواسکر اپنے حکومت کے فیصلے کے حامی بھی نظر آئے اور کہا کہ اگر بھارتی حکومت پاکستان کے خلاف انگلینڈ میں ہونے والے کرکٹ ورلڈ کپ کا میچ نہ کھیلنے کا فیصلہ کرے گی تو وہ اس کا ساتھ دیں گے۔سنیل گواسکر کا کہنا تھا کہ پاکستان کا نقصان عالمی مقابلوں بھارت سے نہ کھیلنے سے نہیں بلکہ دوطرفہ سیریز کے نہ کھیلنے سے ہوتا ہے۔