کون کون سی ٹیمیں ٹی ٹوئنٹی ورلڈ کپ 2020کےلئے براہ راست کوالیفائی کر گئیں کرکٹ کے چاہنے والوں کےلئے انتہائی اہم خبر آگئی
دبئی (آئی این پی)انٹرنیشنل کرکٹ کونسل(آئی سی سی ) نے 2020میں ہونے والے ٹی ٹوئنٹی ورلڈ کپ کے لیے ٹیموں کی گروپ اسٹریجز میں کوالیفکیشن کا اعلان کردیا۔آئی سی سی کی جانب سے جاری ہونے والے اعلامیے کے مطابق ابتدائی طور پر عالمی درجہ بندی میں سرِفہرست 10ٹیمیں کوالیفکیشن کے بغیر ہی ایونٹ میں شامل ہوں گی جبکہ 16ٹیموں پر مشتمل اس ٹورنامنٹ میں 6ٹیمیں کوالیفکیشن کے
بعد داخل ہوسکیں گی۔ٹیموں کا انتخاب 31دسمبر 2018کی رینکنگ پر کیا گیا ہے۔ ابتدائی 8ٹیمیں براہ راست سپر 12میں کھیلیں گی۔ ان میں پاکستان، انڈیا، انگلینڈ، آسٹریلیا، جنوبی افریقا، نیوزی لینڈ، ویسٹ انڈیز اور افغانستان شامل ہیں۔ عالمی کپ مرحلہ وار کھیلا جائے گا جس میں پہلے مرحلے میں 8ٹیمیں ایک دوسرے کے مدِ مقابل ہوں گے جن میں سے صرف 4ٹیمیں اگلے مرحلے یعنی سپر 12مرحلے کے لیے کوالیفائی کریں گی جہاں پہلے سے ہی عالمی درجہ بندی کے مطابق 8ٹیمیں موجود ہوں گی۔گزشتہ برس 31دسمبر تک کی عالمی درجہ بندی کے مطابق سر فہرست پاکستان، بھارت، انگلینڈ، آسٹریلیا، جنوبی افریقہ، ویس انڈیز، نیوزی لینڈ اور افغانستان وہ ٹیمیں ہیں جو پہلے ہی سپر 12مرحلے میں موجود ہیں جبکہ سابق چیمپیئن سری لنکا کے ساتھ بنگلہ دیش پہلے مرحلے میں بقیہ 6 کوالیفائر ٹیموں کے مدِ مقابل ہوں گی۔خیال رہے کہ عالمی درجہ بندی کے مطابق سری لنکا 9ویں جبکہ بنگلہ دیش 10ویں نمبر پر موجود ہے۔ٹی ٹوئنٹی کا سب سے بڑا میلہ
ورلڈ ٹی ٹوئنٹی کے نام سے مشہور تھا تاہم اب اس کا نام تبدیل کرکے ٹی ٹوئنٹی ورلڈ کپ رکھ دیا گیا ہے۔ٹی ٹوئنٹی ورلڈکپ کا ساتواں ایڈیشن 2 سال کی تاخیر کے بعد اب سال 2020میں آسٹریلیا میں کھیلا جائے گا۔6 ٹی ٹوئنٹی ورلڈکپ میں ویسٹ انڈیز 2 بار، انگلینڈ، پاکستان، بھارت اور سری لنکا ایک، ایک بار فاتح رہے ہیں۔یاد رہے کہ سری لنکن ٹیم ٹی ٹوئنٹی ورلڈکپ کی سب سے کامیاب ٹیم ہے جو 3 مرتبہ فائنل کھیلنے کا اعزاز حاصل کرچکی ہے جس میں اسے ایک میں کامیابی ملی جبکہ 2 میں ناکامی کا سامنا کرنا پڑا۔واضح رہے کہ پاکستان نے 2009 میں انگلینڈ میں ہونے ورلڈ ٹی ٹوئنٹی کے فائنل میں سری لنکا کو شکست دینے کے بعد پہلی مرتبہ ٹائٹل جیتنے کا اعزاز حاصل کیا تھا، تاہم اس کے بعد سے اب تک پاکستان فائنل میں بھی نہیں پہنچ سکا ہے۔
