شعیب ،ثانیہ نے اپنے بیٹے کی پہلی تصویر جاری کردی
لاہور(نیوزڈیسک) پاکستان کرکٹ ٹیم کے سابق کپتان شعیب ملک نے کئی ہفتوں کا انتظار کروانے کے بعد بالآخر اپنے بیٹے کی تصویر جاری کر دی ہے ۔شعیب ملک اور بھارتی ٹینس سٹار ثانیہ مرزا کے ہاں رواں سال31 اکتوبر کو بیٹے کی پیدائش ہوئی تھی جس کا نام انہوں نے’ اذہان مرزا ملک‘رکھنے کا اعلان کیا تھا۔ثانیہ مرزا اس سے قبل بھی کئی مرتبہ اپنے بیٹے
کی جھلک سوشل میڈیا پر اپنے فینز کو دکھا چکی ہیں لیکن یہ پہلا موقع ہے کہ سٹار جوڑی کے سٹار بیٹے کی واضح تصویر سامنے آئی ہے۔ شعیب ملک نے اپنے بیٹے کی تصویر ٹوئٹر پر اپنے مداحوں سے شیئر کی اور ساتھ لکھا کہ” تیز ترین لین میں زندگی جینا بھی ایک تفریح ہو سکتی ہے، اب دنیا کو ہیلو کہنے کا وقت ہوا چاہتا ہے“۔ یاد رہے کہ اس سے قبل ثانیہ مرزا سے جب پوچھا گیا کہ انہوں نے آج تک اذہان کی کوئی تصویر سوشل میڈیا پر پوسٹ کیوں نہیں کی تو اس کے جواب میں انہوں نے کہا کہ ’ آپ مجھے دقیانوسی کہیں یا جو بھی مگر میں نظر بد پر یقین رکھتی ہوں۔ ہمارے بچے کوتوجہ کی ضرورت ہے،وہ ابھی بہت چھوٹا ہے۔میں نے اور شعیب نے فیصلہ کیا ہے کہ اس کی ہر طرح سے حفاظت کریں گے۔‘انہوں نے مزید کہا کہ اس کا مطلب یہ نہیں کہ میں ان لوگوں پر تنقید کر رہی ہوں جو اپنے بچوں کی تصویریں سوشل میڈیا پر پوسٹ کرتے ہیں۔‘ثانیہ مرزا سے ان کے ٹینس میں واپسی کے بارے میں سوال کیا گیا تو انہوں نے کہا کہ ’میں دوبارہ کھیلنا چاہتی ہوں ، ٹینس سے مجھے پیار ہے مگر جب میں امید سے ہوئی تو مجھے اپنی ترجیحات بدلنی پڑیں۔ میں بالکل واپس آﺅں گی، اور میں جب
واپس آﺅں گی تو سب پھر سے ویسا ہی ہو جائے گا۔‘ثانیہ مرزا نے اگلے سال کے آخر میں ٹینس میں واپسی کا امکان ظاہر کیا ہے۔ ان کا کہنا ہے کہ میں کوئی خاص تاریخ نہیں بتا سکتی مگر میرا ارادہ 2019 ءکے آخر میں ٹینس دوبارہ شروع کرنے کا ہے۔‘ثانیہ مرزا چاہتی ہیں کہ وہ ایک اچھی ماں اور اچھی کھلاڑی ہونے کا حق ادا کریں، ابھی ان کا بچہ بہت چھوٹا ہے وہ عمر کے اس حصے میں ہے، وہ اس کو وقت دینا چاہتی ہیں۔وہ چاہتی ہیں کہ جب کھیل میں واپس آئیں تو ساری توجہ ٹینس پر ہو ، وہ خود پر کوئی اضافی دباﺅنہیں ڈالنا چاہتیں۔
Living life in the fast lane can be fun !!! It’s time to say hello to the world 😀 pic.twitter.com/PVBU987wjc
— Sania Mirza (@MirzaSania) December 22, 2018
