لاہور:پاکستان مسلم لیگ(ن)کےصدراورقائدحزب اختلاف شہبازشریف کو معروف کرکٹر شاہد آفریدی کا ٹیلی فون، شاہد آفریدی نے شہباز شریف کو رہائی پر مبارک دی اور رمضان المبارک پر نیک تمناؤں کا اظہار کیا ۔شہباز شریف نے خیرسگالی کے جذبات کے اظہار پر شاہد آفریدی کا شکریہ ادا کیا۔ اس سے قبل پاکستان مسلم لیگ(ن) کے صدر شہباز شریف نےبشیر میمن کے انکشافات پر تحقیقات کا مطالبہ کرتے ہوئے کہا ہے کہ سابق ڈی جی ایف آئی اے کے ہوشربا انکشافات نے میرے دیرینہ موقف کی تصدیق کر دی ہے ،بشیر میمن کے عمران نیازی کے بارے میں انکشافات انتہائی شرمناک، تشویشناک ، افسوسناک اور قابل مذمت ہیں، یہ فسطائیت اور منتقم مزاجی کی انتہا ہے،
بشیر میمن کے انکشافات کی تحقیقات کرائی جائیں اور ملوث کرداروں کے خلاف سخت قانونی کارروائی کی جائے۔انہوں نےکہا کہ یہ ہےغداری،دیدہ دانستہ اپنے ہی ملک کو افراتفری اور انتشار کا شکار کرنا،ان انکشافات سے یہ بھی تصدیق ہوئی کہ آپ نے بائیس کروڑ کے ملک کو اپنی انا، ضد اور انتقامی سوچ و بغض کی بھینٹ چڑھا دیا،سابق ڈی جی ایف آئی اے کے ہوشربا انکشافات نے میرے اس دیرینہ موقف کی تصدیق کر دی ہے کہ نیب نیازی گٹھ جوڑ مسلم لیگ (ن) کے خلاف بے بنیاد مقدمات بنانے اور ان کے قائدین کو جیل بھجوانے کے لئے سرگرم عمل ہے، یہ ڈھونگ پوری طرح بے نقاب ہو چکا ہے۔
