کراچی: نامعلوم افراد نے فائرنگ کر کے معروف ٹک ٹاکر مسکان شیخ کو قتل کر دیا۔تفصیلات کے مطابق کراچی کے علاقے گارڈن میں ایک انتہائی افسوسناک واقعہ پپش آیا ہے جہاں نامعلوم افراد کی فائرنگ سے ٹک ٹاکر مسکان شیخ سمیت 4 افراد جاں بحق اور دو زخمی ہو گئے ہیں۔بتایا گیا کہ کراچی کے علاقے گارڈن انکل سریا اسپتال کے قریب نامعلوم افراد نے کارپر فائرنگ کر کے 4 افراد کو نشانہ بنایا۔ فائرنگ کے نتیجے میں زخمی ہونے والوں کو فوری طور پر اسپتال منتقل کیا گیا۔جہاں دورانِ علاج مزید دو زخمی دم توڑ گئے۔
جن کی شناخت ریحان شاہ اور عامر خان کے ناموں سے کی گئی، جو مسکان شیخ کے ساتھ ٹک ٹاک پر ویڈیو بناتے تھے۔بعدازاں ایس ایس پی سٹی سرفراز نواز نے فائرنگ کے واقعے متعلق مفصل بیان جاری کرتے ہوئے بتایا کہ کار پر فائرنگ کا واقعہ صبح پونے پانچ بچے پیش آیا۔ واردات میں ایک موٹرسائیکل اور رکشے کا استعمال کیا گیا،سرفراز نواز کے مطابق ملزمان نے کار کا پیچھا کرنے کے بعد اس پر فائرنگ کی۔ ملزمان کی فائرنگ سے کار میں سوار خاتون موقع پر ہی جاں بحق ہوئیں جن کی شناخت مسکان کے نام سے کی گئی،بعدازاں گاڑی میں موجود تین افراد نے گاڑی بھگائی تو ملزمان نے ایک بار پھر ان پر فائرنگ کی جس کے نتیجے میں تینوں افراد شدید زخمی ہوئے۔ فائرنگ کی سی سی ٹی وی فوٹیج بھی سامنے آئی ہے جس میں موٹرسائیکل اور رکشے کو کار کا تعاقب کرتے دیکھا جا سکتا ہے جب کہ فائرنگ کے وقت اسپتال کا عملہ بھی بھاگتے ہوئے دکھائی دے رہا ہے۔پولیس نے عینی شاہدین کا بیان بھی ریکارڈ کر لیا ہے۔عینی شاہدین کا کہنا ہے کہ وہ ملزمان کو نہیں دیکھ سکے۔حملہ آور فائرنگ کر کے فوری فرار ہو گئے تھے۔عینی شاہد کے مطابق ایک زخمی شخص جان بچانے کے لیے اسپتال میں بھی داخل ہوا اور اسی دوران اسپتال میں فائرنگ شروع ہو گئی۔میں فائرنگ کے ڈر سے بھاگا، فائرنگ تھمنے کے بعد واپس تو دیکھا کہ لاش پڑی ہے۔
