اسلام آباد (ویب ڈیسک) ماڈل و اداکارہ زینب جمیل نے ااسلام کی خاطر شوبز انڈسٹری چھوڑنے کا اعلان کردیا۔ انہوں نے سماجی رابطے کی ویب سائٹ انسٹا گرام پر جاری کی گئی اپنی ایک پوسٹ میں لکھا کہ میں بہت خوشی سے اس بات کا اعلان کررہی ہوں کہ میں شوبزکومکمل طورپر چھوڑ رہی ہوں۔ انہوں نے کہا کہ میں اداکاری اور ماڈلنگ کے کیرئیر کو خیرباد کہہ رہی ہوں۔ الحمداللہ ، اللہ نے قرآن اور حدیث پاک کی طالبہ بننے اور ہمارے دین اسلام سے متعلق زیادہ سیکھنے کے لیے میرا انتخاب کیا ہے ۔ تاکہ میں اپنے مذہب کے بارے مزید جان سکوں اور اسلام کے مطابق اپنی زندگی بسر کر سکوں۔
زینب جمیل کے اس اعلان پر ان کے مداحوں نے ان کے فیصلے کا خیر مقدم کیا جبکہ شوبز سے تعلق رکھنے والے کئی اداکاروں اور اداکاراؤں نے بھی ان کے فیصلے کو خوب سراہا۔ واضح رہے کہ زینب جمیل نے نجی چینل سے بطورنیوز اینکر اپنے کیریئر کا آغاز کیا تھا جس کے بعد زینب نے بطور وی جے بھی کام کیا۔ فیشن ماڈلنگ کے علاوہ زینب جمیل کے کریڈٹ پر ڈراموں میں آپ کی کنیز، سدا سکھی رہو، سُسرال میری بہن کا، مل کے بھی ہم نہ ملے اور منچلی شامل ہیں۔ ڈراموں کے علاوہ زینب نے فلم ”جوانی پھرنہیں آنی” میں بھی اپنے جوہر دکھائے۔
