کراچی( نیوز ڈیسک) سندھ کابینہ نے جرائم اور موٹر سائیکل چوری کی وارداتوں کو روکنے کے لیے موٹر وہیکل آرڈیننس 1965 میں ترمیم کردی گئی جس کے تحت نئی بائیک خریدنے والوں کو موٹرسائیکل میں ٹریکر لگوانا اب لازم ہوگا۔آرڈیننس میں ترمیم کا فیصلہ وزیراعلیٰ سندھ مراد علی شاہ کی زیر صدارت سندھ کابینہ اجلاس میں کیا گیا۔ مراد علی شاہ نے ترمیم کی منظوری دیدی جس کے بعد موٹرسائیکل میں ٹریکر نصب کروانے کی شرط قانون کی شکل اختیار کرگئی ہے۔ترمیمی آرڈیننس کے مطابق نئی موٹرسائیکل خریدنے والے کو اپنی موٹرسائیکل میں ٹریکر لازمی نصب کروانا ہوگا جبکہ پرانی موٹرسائیکل کے مالک کو اس معاملے میں استحقاق دیا گیا ہے۔رپورٹ کے مطابق صوبے میں اس وقت 44 لاکھ موٹرسائیکلیں موجود ہیں۔صوبائی حکومت کی جانب سے سندھ ایکسائز اینڈ ٹیکسیشن بورڈ کو ہدایت کی گئی ہے کہ وہ ٹریکر لگی موٹر سائیکلوں کی ہی رجسٹریشن کریں۔