بنی گالہ میں عمارتوں کی ریگولرائزیشن سے متعلق کیس ،سپریم کورٹ کا عمران خان سمیت 65 لوگوں کی تعمیرات ریگولرائز کرنےکا حکم

اسلام آباد(نیوزڈیسک)سپریم کورٹ آف پاکستان نے بنی گالہ میں عمارتوں کی ریگولرائزیشن سے متعلق کیس میں عمران خان سمیت 65لوگوں کی تعمیرات ریگولرائز کرنے کا حکم دیدیا۔چیف جسٹس ثاقب نثارکی سربراہی میں بنچ نے بنی گالہ میں عمارتوں کی ریگولرائزیشن سے متعلق کیس کی سماعت کی، ایڈیشنل اٹارنی جنرل نے کہا کہ زون 4 میں 72 ہزارایکڑسے زیادہ رقبہ ہے،زون 4 میں 65 ہزارگھرتعمیرہوچکے ہیں،چیف جسٹس نے زون 4 میں 65 ہزارگھروں کی تعمیر پر تعجب کا اظہارکیا،ایڈیشنل اٹارنی جنرل نے کہا کہ عمران خان کاگھرزون 3 اورزون 4 میں آتاہے،وزیراعظم نے گھرکی ریگولرائزیشن کیلئے درخواست دے رکھی ہے۔ایڈیشنل اٹارنی جنرل نے بتایاکہ رہائشی علاقوں کیلئے 6 روپے فی مربع فٹ فیس مقررکی ہے،عمارت کے استعمال میں تبدیلی کی فیس الگ ہوگی ، جسٹس اعجازالاحسن نے استفسار کیا کہ 2005 سے اب تک ریگولرائزیشن کیوں نہیں ہوئی؟چیف جسٹس پاکستان نے استفسار کیا کہ عمران خان کے وکیل بابراعوان کہاں ہیں؟ان کوآج آناچاہئے تھا،پتہ کریں بابراعوان کہاں ہیں؟چیف جسٹس نے کہا کہ یہ اتناآسان کام نہیں جتنانظرآتا ہے۔ایڈیشنل اٹارنی جنرل نے کہا کہ بنی گالہ میں زلزلہ سے بچاؤکی تدابیرکے بغیرعمارتیں تعمیرکی گئیں،چیف جسٹس نے کہا کہ حیران ہوں سی ڈی اے میں کیاہورہاہے؟سی ڈی اے والے اب ہی کچھ کرلیں،انصاف کرناصرف عدالتوں ہی کاکام نہیں،خدانخواستہ زلزلہ آتاہے توبہت بڑی عمارت تباہ ہوسکتی ہے۔چیف جسٹس نے استفسار کیا کہ جب یہ عمارتیں بن رہی تھیں سی ڈی اے کہاں تھا؟عمران خان نے زون 3 کے بارے میں درخواست دائر کی تھی،زون 3 کی حالت زون 4 سے بھی بری ہے،تمام متعلقہ حکام پرمشتمل کمیٹی قائم کی،اس کی رپورٹ ابھی نہیں آئی،ایڈیشنل اٹارنی جنرل نے کہا کہ کمیٹی نے تعمیرات کوریگولرائزکرنے کی سفارش کی ہے۔جسٹس اعجاز الاحسن نے کہا کہ 65 ہزارگھروں میں اب تک 65 درخواستیں آئی ہیں،ماسٹرپلان کے بغیر کیسے ریگولرائزیشن کریں گے؟ایڈیشنل اٹارنی جنرل نے کہا کہ ماسٹرپلان موجودہے،عدالت نے عمران خان سمیت 65 لوگوں کی تعمیرات ریگولرائزکرنےکاحکم دیدیا، ریگولرائزیشن کمیٹی کی مزیدتفصیلات دینے کیلئے 10 روزمہلت کی استدعاکردی،عدالت نے کیس کی سماعت 10 روزکیلئے ملتوی کردی۔