اسلام آباد:نگران حکومت نے بیرونِ ملک سے بینکنگ چینلز سے پیسے بھیجنے والوں کے لیے انعامی سکیم کا اعلان کردیا۔ نگراں وزیر خزانہ شمشاد اختر نے کہا کہ انعامی سکیم کے لیے 20 ارب روپے جاری کیے گئے ہیں، جو باہر سے پیسا بھجوا رہے ہیں یہاں ان کے رشتے دار مفت وصول کریں گے۔ شمشاد اختر نے کہا کہ اوور سیز پاکستانیوں کے لیے سوہنی دھرتی ریمیٹنس سکیم بنائی ہے، 100 ڈالر سے اوپر ترسیلاتِ زر بھیجنے والے بغیر فیس یہاں وصول کر سکیں گے۔

نگراں وزیر خزانہ نے کہا کہ ترسیلاتِ زر بھیجنے والوں کو پوائنٹس دیے جائیں گے، جس کے تحت کئی سرکاری اداروں سے خدمات اور اشیا رعایتی نرخ پر لی جا سکیں گی، زیادہ ترسیلاتِ زر بھیجنے والوں کے درمیان قرعہ اندازی کے ذریعے نقد انعامات بھی دیں گے۔انہوں نے کہا کہ حکومت ایکسچینج کمپنیوں کے لیے بھی مراعات فراہم کرے گی، قانونی ذرائع سے ترسیلاتِ زر بھیجنے پر مارکیٹنگ کے بدلے مراعات دی جائیں گی۔