لاہور: پاکستان تحریک انصاف کے رہنماء جہانگیر ترین کو بڑا ریلیف مل گیا ، عدالت نے 19 مئی تک گرفتار کرنے سے روک دیا۔ تفصیلات کے مطابق لاہور کی مقامی عدالت میں پی ٹی آئی رہنماء جہانگیر ترین کے خلاف منی لانڈرنگ کیس کی سماعت ہوئی ، جہاں جہانگیر ترین اور ان کے صاحبزادے علی ترین عدالت میں پیش ہوئے ، عدالت نے جہانگیر ترین کے خلاف تین مقدمات کی سماعت کی اور جہانگیر ترین اور علی ترین کی عبوری ضمانت میں 19 مئی تک توسیع کرتے ہوئے پاکستان تحریک انصاف کے رہنما جہانگیر ترین کو 19 مئی تک گرفتار کرنے سے روک دیا۔ دوران سماعت عدالت نے پراسیکیوٹر سے استفسار کیا کہ جہانگیر ترین اور علی ترین کے کیس کا کیا بنا؟

جس پر پراسیکیوٹر نے جواب دیا کہ کیس میں شفاف تفتیش نہیں ہو رہی ، جج نے استفسار کیا کہ آپ سے جے آئی ٹی رپورٹ مانگی تھی کیا آپ لائے ہیں؟ آپ نے مقدمہ درج کیا اس کی رپورٹ کہاں ہے؟۔ بتایا گیا ہے کہ عدالت میں پیشی سے قبل پی ٹی آئی رہنماء جہانگیر ترین کے گھر پر ان کے ہم خیال گروپ کی اہم ملاقات ہوئی ، جس میں شرکاء نے جہانگیر ترین سے اظہار یکجہتی کیا اور بھرپورت تعاون کی بھی یقین دہانی کرائی۔ ترجمان جہانگیر ترین کے مطابق 2 صوبائی وزرا نعمان لنگڑیال اور اجمل چیمہ جہانگیر ترین کے ہمراہ عدالت پہنچے جب کہ 4 مشیر عبدالحئی دستی، امیر محمد خان، رفاقت گیلانی اور فیصل حیات جبوانہ بھی ان کے ہمراہ تھے ، اس کے علاوہ ارکان صوبائی اسمبلی خرم لغاری، اسلم بھروانہ، نذیر چوہان، آصف مجید، عمر آفتاب، طاہر رندھاوا، زوار وڑائچ اور نذیر بلوچ بھی جہانگیر کے ساتھ عدالت پہنچے۔