اسلام آباد : وزیراعظم عمران خان نے اتحادی جماعتوں کو وفاقی کابینہ میں مزید حصہ دینے کا فیصلہ کرلیا، حکومت کی اہم اتحادی جماعت بلوچستان عوامی پارٹی کو 2 وزارتیں اور ایم کیو ایم کو وزیر مملکت کا قلمدان دیے جانے کا امکان ہے، وزیراعظم جلد اتحادی جماعتوں کے سربراہان سے مشاورت کریں گے۔ ذرائع کے مطابق وزیراعظم عمران خان نے اتحادی جماعتوں ایم کیوایم اور بی اے پی کے مزید ارکان کو وفاقی کابینہ میں شامل کرنے کا فیصلہ کرلیا ہے۔ حکومت کی اہم اتحادی جماعت بلوچستان عوامی پارٹی کو 2 وزارتیں اور ایم کیو ایم کو وفاقی کابینہ میں وزیر مملکت کا قلمدان دیے جانے کا امکان ہے۔
بلوچستان عوامی پارٹی سے سینیٹر کہدہ بابر، سینیٹرسرفراز بگٹی، سردار اصرار ترین وزارت کیلئے مضبوط امیدوار ہیں جبکہ ایم کیو ایم سے فیصل سبزواری کو وزیر مملکت بنائے جانے کا امکان ہے۔ وزیراعظم وفاقی کابینہ میں توسیع کیلئے جلد اتحادی جماعتوں کے سربراہان سے مشاورت کریں گے۔ واضح رہے وزیراعظم عمران خان نے دورہ لاہور کے دوران وفاقی کابینہ میں ردو بدل کا فیصلہ کیا تھا۔ بتایا گیا ہے کہ ممبران کے قلمدان بھی تبدیل ہونے کا امکان ہے۔ بیرسٹر علی ظفر، فیصل واوڈا کو وفاقی کابینہ میں شامل کیے جانے کا امکان بھی ظاہر کیا گیا ہے۔ ذرائع نے بتایا ہے کہ وزیر اعظم عمران خان وزراء کی کارکردگی پرکابینہ میں ردوبدل کریں گے اور نو منتخب سینیٹرز کوبھی کو وفاقی کابینہ میں شامل کیےجانے کا امکان ہے۔ وزیر اعظم عمران خان کئی اہم وزرا کی کارکردگی سے خوش نہیں، اس لئے انہوں نے فیصلہ کیا ہے کہ کابینہ میں صرف وہی رہیں گے جو ڈیلیور کرسکیں گے، ایک اہم وفاقی وزیر نے اپنا نام نہ بتانے کی شرط پر کہاکہ وزیر اعظم کو یہ احساس ہو گیا ہے کہ پارٹی حلقوں میں مایوسی بڑھ رہی ہے، وزیر اعظم پختہ یقین رکھتے ہیں کہ وزراء کو کسی عذر پیش کیے بغیر کارکردگی دکھانا ہوگی۔ ڈیلیور اورکارکردگی ہی وہ چیزیں ہیں جس میں وزیر اعظم دلچسپی لیتے ہیں کیونکہ وہ کسی بھی وجہ سے منصوبوں کی تکمیل میں غیرمعمولی تاخیر کے بعد بہانے سننے کو اچھا نہیں سمجھتے۔
