لاہور (ویب ڈیسک) مسلم لیگ ق کے رہنما اور رکن قومی اسمبلی مونس الٰہی نے کہا ہے کہ کسی صورت تحریک انصاف کی حکومت کو ڈی ریل نہیں ہونے دیں گے ، ق لیگ کو کوئی مائنس ون فارمولا قبول نہیں۔ اپنے ایک ٹویٹ میں مونس الٰہی کا کہنا تھا حکومتی کمیٹی نے ہمارے زیادہ تر مطالبات تسلیم کرلیے ہیں، آج ملاقات میں باقی مطالبات بھی مان لیے جائیں گے ، موجودہ کمیٹی نے پہلی کمیٹی سے طے پانے والے امور بھی تسلیم کر لیے ہیں۔ان کا کہنا تھا کہ مذاکرات کااختتامی راؤنڈمکمل ہوگیا، دونوں پارٹیاں اب ایک پیج پرہیں ، انہوں نے ٹویٹ کیا کہ انشااللہ(ق)لیگ اورتحریک انصاف کااتحادجاری رہے گا۔
دوسری جانب ایک خبر کے مطابق حکومت نے پنجاب اور مرکز میں اتحادی جماعت مسلم لیگ (ق) کے مطالبات تسلیم کرلئے اور دونوں جماعتوں نے اتحاد برقرار رکھتے ہوئے آئندہ الیکشن بھی ساتھ لڑنے کا اعلان کیا ہے ۔حکومتی مذاکراتی کمیٹی اتحادی جماعت (ق) لیگ سے مذاکرات کیلئے چودھری برادران کی رہائشگاہ پہنچی، کمیٹی میں گورنرپنجاب چودھری سرور، وزیراعلیٰ عثمان بزدار، وفاقی وزرا پرویز خٹک، اسد عمر اور شفقت محمود بھی شامل تھے ۔مسلم لیگ (ق) کی قیادت نے حکومتی کمیٹی کے ارکان کا استقبال کیا جس کے بعد مذاکرات شروع ہوئے ۔ ذرائع نے دعویٰ کیاکہ حکومتی کمیٹی نے مسلم لیگ (ق) کے مطالبات تسلیم کرلئے جس کے بعد (ق) لیگ کوترقیاتی فنڈز جلد جاری کردیئے جائیں گے اور اس معاملے پر آئندہ دو روز میں فالو اپ میٹنگ اسلام آباد میں ہوگی۔ذرائع کا کہناتھا (ق) لیگ کے وزرا وزارتوں کے معاملات میں بااختیار ہونگے جبکہ کسی بھی قابل اعتراض افسر کی تقرری پر تحریک انصاف اعتراض کرسکے گی اور اعتراض پر مسلم لیگ (ق) متعلقہ وزارت میں تعیناتی کیے گئے نئے افسرکا نام دینے کی پابند ہوگی۔ذرائع کے مطابق مسلم لیگ (ق) اپنے متعلقہ اضلاع میں عوامی مسائل کے حل کیلئے با اختیار ہوگی، تعیناتیوں ،مختلف کمیٹیوں اور حکومتی اداروں میں نمائندگی میں ق لیگ کی تجاویز پرعمل کیا جائے گا۔
