اسلام آباد(مانیٹرنگ ڈیسک)سابق وزیراعظم آج آٹھویں روز بھی سروسز اسپتال میں زیر علاج ہیں جہاں ان کی طبیعت بدستور ناساز ہے۔ نواز شریف کے جسم میں پلیٹ لیٹس کی تعداد معمولی اضافے کے بعد 28 ہزار پر برقرار ہے۔ ذرائع کے مطابق انجیکشن کا کورس ختم ہونے پر میاں نوازشریف کا اب نیا علاج کرنے پر غور کیا جارہا ہے اور آج صبح میڈیکل بورڈ نے نوازشریف کا ایک مرتبہ پھر سے تفصیلی طبی معائنہ بھی کیا۔ذرائع میڈیکل بورڈ کے مطابق پلیٹ لیٹس سیلز کی تعداد میں اضافہ کے لیے اسٹریرائیڈ انجیکشن سولو میڈرول 250 ایم جی بھی تجویز کیا گیا۔ سولو میڈرول انجیکشن ایک صبح 10 بجے اور دوسرا رات دس بجے لگے گا۔اسپتال ذرائع نے بتایا کہ سابق وزیراعظم نواز شریف کے پلیٹ لیٹس سیلز بڑھانے کے لیے اسٹریرائیڈ انجکشن سولو میڈرول دینے سے گردے بھی متاثر ہونے لگے۔آج صبح کیے جانے والے تفصیلی طبی معائنے میں نواز شریف کا بلڈ پریشر پہلے سے بہتر ہے جو

140/80 آیا ہے۔ میڈیکل بورڈ کی جانب سے نوازشریف کو قبض کی شکایت پر سیرپ کریما فین تجویز کیا ہے۔ جبکہ ڈاکٹرز کی جانب انسولین کے 18 یونٹ تجویز کیے گئے ہیں۔ مزید برآں سابق وزیراعظم نواز شریف کے رینل فنکشنل ٹیسٹ (RFT) رپورٹ میں بلڈ یوریا اور کریٹینین معمول سے زیادہ آیا ہے۔نارمل 50 سے کم ہونی چاہئیے لیکن نوازشریف کی بلڈ یوریا 63 ہے۔ نوازشریف کا سریم کریٹینین بھی معمول سے زیادہ ہے، نارمل 1.3 سے کم ہونا چاہئیے جبکہ نوازشریف کا 1.4 ہے۔ نواز شریف کا بلڈ پریشر اور شوگر بھی قابو میں نہیں ہے، نوازشریف کو گذشتہ کئی سالوں گردوں میں درد اور پتھریوں کا بھی سامنا ہے۔ خیال رہے کہ سابق وزیراعظم نواز شریف گذشتہ آٹھ روز سے لاہور کے سروسز اسپتال میں زیر علاج ہیں جہاں ان کا باقاعدہ علاج کیا جا رہا ہے۔ دوسری جانب آج اسلام آباد ہائیکورٹ میں سابق وزیراعظم نواز شریف سے سزا معطلی سے متعلق دائر درخواست پر بھی سماعت ہو گی۔