تہران(نیوز ڈیسک) ایران میں ایک مسافر بردار طیارے کو مصروف شاہراہ کے بیچوں بیچ ہنگامی لینڈنگ کرنا پڑی جس کے نتیجے میں طیارے کو شدید نقصان پہنچا تاہم معجزانہ طور پر تمام مسافر محفوظ رہے۔عالمی خبر رساں ادارے کے مطابق سوشل میڈیا پر ایک فوٹیج وائرل ہو رہی ہے، ویڈیو فوٹیج مشہد شہر کی ایک مرکزی شاہراہ کی ہے جس پر ایرانی طیارہ گرا ہوا اور شہری اپنی مدد آپ کے تحت مسافروں کو باہر نکال رہے ہیں۔اب تک حاصل ہونے والی معلومات کے مطابق ایرانی طیارے میں 130 مسافر سوار تھے، طیارے کو خرابی کے باعث ہنگامی لینڈنگ کرنا تھی، رن وے دور ہونے کی وجہ سے پائلٹ نے طیارے کو سڑک کے بیچوں بیچ

لینڈنگ کرا دی۔ ایرانی حکام کی جانب سے اس واقعے کی تفصیلات جاری نہیں کی گئی ہیں۔اس سے قبل اتوار کے روز بھی ایک مسافر طیارہ تہران کے مہرآباد ہوائی اڈے پر ہنگامی لینڈنگ پر مجبور ہو گیا تھا۔یہ طیارہ ترکی کے شہر استنبول جا رہا تھا۔ایرانی خبر رساں ایجنسی کے مطابق مذکورہ ایئربس طیارہ ایران ایئر ٹورفضائی کمپنی کا تھا اور فنی خرابی کے باعث واپس تہران لوٹ گیا۔یہ حادثات اور واقعات ایسے وقت سامنے آ رہے ہیں جب 8 جنوری کو ایرانی پاسداران انقلاب کے میزائلوں کے ذریعے یوکرین کے ایک مسافر طیارے کو مار گرائے جانے کے حوالے سے تحقیقات جاری ہیں۔ حادثے میں طیارے میں سوار تمام 176 افراد ہلاک ہو گئے تھے۔