اسلام آباد (نیوز ڈیسک ) وفاقی وزیر مملکت موحولیاتی تبدیلی زرتاج گل نے کہا ہے کہ میری ہنسی سے بھی جلتے ہیں،میں آپ کی غلام ہوں؟ آپ عورت کی تذلیل پرخوش ہوتے ہیں، ویڈیو لائی جائے ورنہ الزام لگانے والوں پرسائبرایکٹ کے تحت مقدمہ درج کیا جائے، بغیرثبوت کے کسی پرالزام نہیں لگانا چاہیے۔ انہوں نے قومی اسمبلی میں مبشر لقمان کیخلاف شدید انداز میں اظہار خیال کرتے ہوئے کہا کہ خواتین پرالزام لگ رہے ہیں اوراپوزیشن ارکان خوش ہورہے ہیں۔ ہمیں یہ سکھایا جائے کہ آپ ماضی یاد کرا کے تنقید کرنے لگے ہیں۔ میری بہن آسٹریلیا سے پوچھ رہی ہے کہ ویڈیو کا معاملہ کیا ہے۔4سال کی بیٹی اورمیری بہن الزامات پرسوال کررہی ہیں۔
انہوں نے کہا کہ عزت سب کی برابرہے ،خواتین بھی الیکشن لڑ کر آتی ہیں۔ میڈیا پوچھتا ہے کس رنگ کے کپڑے پہنے پرس کس برانڈ کا ہے۔ جواب نہ دیں تو کہتے خاتون بدتمیزی کر رہی ہے۔ انہوں نے کہا کہ جب آپ کھڑے ہو کر یہاں گالیاں دیتے ہیں تو سب بھول جاتے ہیں۔ آپ عورت کی تذلیل پرخوش ہوتے ہیں۔ انہوں نے کہا کہ ویڈیو لائی جائے ورنہ ایف آئی اے الزام لگانے والوں کو پکڑے۔ الزام لگانے والوں پرسائبرایکٹ کے تحت مقدمہ درج کیا جائے۔ بغیرثبوت کے کسی پرالزام نہیں لگانا چاہیے۔ انہوں نے کہا کہ جب ان کے پاس کوئی بات نہیں ہوتی تو کہنا کہ ایک وزیر کی ہنسی بڑی مشہور ہے، میری ہنسی سے بھی جلتے ہیں کیا میں آپ سے پوچھ کر ہنسوں؟ میں آپ کی غلام ہوں؟ اس موقع پراسپیکرنے زرتاج گل سے مکالمہ کیا کہ آپ اس حوالے سے تحریک لے آئیں ہم بحث کرائیں گے۔
اس موقع پر وفاقی وزیر فواد چودھری نے کہا کہ ہم پر یو ٹیوب چینلز کی بلا نازل ہوگئی ہے۔ ایک دن پہلے اینکرنے یو ٹیوب پر پروگرام کیا۔ جس میں پگڑی اچھالی گئی۔ کیا الیکشن لڑنے کی شرط ہے کہ آتا جاتا آدمی ہمیں چھتر مارے۔ میں نے اپنے پروگرام میں کسی کی پگڑی نہیں اچھالی۔ اگر پاناما ایشو پر پگڑی اچھالی ہے تو وہ پگڑی اچھالنا نہیں ہے۔
