نئی دہلی: بھارتی ٹینس سٹار ثانیہ مرزا کرکٹ ٹیموں کی ناکامی کا ذمہ دار پلیئرز کی بیگمات کو قرار دینے پر غصے میں آگئیں۔ ایک تقریب میں جب ثانیہ مرزا سے پوچھا گیا کہ سابق پاکستانی کپتان شعیب ملک کی اہلیہ ہونے کے ناطے ورلڈ کپ2019ءمیں پاکستان کی شکست کا ذمہ دار انھیں ٹھہرایا جارہا تھا، تو ثانیہ مرزا نے کہاکہ آخر کھلاڑیوں کی خراب کارکردگی کا ذمہ دار ان کی بیوی یا گرل فرینڈز کو کیوں ٹھہرایا جاتا ہے، یہاں پر جب ویرات کوہلی زیرو پر آﺅٹ ہوں تو تنقید انوشکا شرما پر شروع ہوجاتی ہیں، بیویوں اور پارٹنرز پر یہ کہہ کر ٹورز پر پابندی عائد کردی جاتی ہے

کہ ان کی وجہ سے کھلاڑیوں کی توجہ منتشر ہوگئی، یہ سوچ غلط ہے، بیویاں توجہ منتشر نہیں کرتیں بلکہ پلیئرز کا حوصلہ بڑھاتی ہیں۔ یاد رہے کہ ثانیہ مرزا ورلڈ کپ2019ءمیں اپنے شوہر کے ساتھ وقت گزارنے کے لیے بھی برطانیہ گئی تھیں جہاں بھارت کے خلاف میچ سے دو دن قبل ان کی اپنے شوہر اور پاکستانی کھلاڑیوں کے ساتھ شیشہ بار میں انجوائے کرنے کی تصاویر سامنے آئیں جس کے بعد قومی ٹیم کو بھارت کے خلاف بدترین شکست کے بعد ثانیہ مرزا پر بھی شدید تنقید کی گئی تھی ۔