لاہور (آن لائن) اپوزیشن جماعتوں کی طرف سے مولانا فضل الرحمان کے آزادی مارچ میں شرکت کے اعلان اور پریس کانفرنس کے جواب میں صوبائی وزیرِ کالونیز فیاض الحسن چوہان نے کہا ہے کہ آل پاکستان لوٹ مار ایسوسی ایشن کا یہ کہنا کہ اقوامِ متحدہ جنرل اسمبلی میں اچھی تقریر کرنے سے ملک میں مہنگائی ختم نہیں ہو گئی،بالکل ٹھیک ہے۔ انہوں نے کہا کہ اچھی تقریر کرنے سے واقعی مہنگائی ختم نہیں ہوتی۔شاید امریکہ کے نیویارک ایئرپورٹ پر شاہد خاقان عباسی کی طرح جامہ تلاشی دیکر مہنگائی ختم ہوتی ہے، اور شاید شاہد خاقان عباسی کے کپڑے اتروانے سے

ملک میں آٹا 25 روپے سستا ہو گیا تھا۔ فیاض الحسن چوہان نے کہا کہ آل پاکستان لوٹ مار ایسوسی ایشن کو ایسی باتیں کرنے سے پہلے شرم سے ڈوب مرنا چاہئیے۔ صوبائی وزیر نے کہا کہ دورہ امریکہ کے بعد عمران خان کی تعریف سابق بھارتی جج جسٹس کانجو سے لے کر سابق سفارتکار اور بیوروکریٹ بھی کر رہے ہیں۔دشمن ملک بھی اعتراف کر رہا ہے کہ عمران خان نے اقوامِ متحدہ میں میلہ لوٹ لیا۔ صوبائی وزیرِ کالونیز نے کہا کہ آل پاکستان لوٹ مار ایسوسی ایشن کے بیانات قابلِ مذمت ہیں۔ماضی میں ن لیگ اور پیپلز پارٹی کی خراب معاشی پالیسیوں کی بدولت ملک آج اس حالت تک پہنچا ہے۔ انہوں نے مزید کہا کہ عمران خان نے نہ صرف پاکستان بلکہ پوری امت مسلمہ اور کشمیر کا مقدمہ کامیابی سے لڑا ہے۔ انہوں نے کہا کہ حکومت کی طرف سے ان تمام پارٹیوں کو آزادی مارچ کی کھلی دعوت ہے۔ فیاض الحسن چوہان نے زور دیتے ہو ئے کہا کہ موچی گیٹ، لاڑکانہ میں بڑے بڑے جلسے کرنے والی پارٹیاں آج اس مقام پر آ پہنچی ہیں کہ انہیں جمعیت علمائے اسلام (ایف) جیسی علاقائی جماعت کا سہارا لینا پڑ رہا ہے۔ انہوں نے امید ظاہر کی کہ عمران خان کی قیادت میں پاکستان جلد معاشی استحکام حاصل کرے گا۔