لاہور(نیوز ڈیسک) پاکستان کے مایہ ناز سابق فاسٹ باﺅلر شعیب اختر نے کہا ہے کہ مجھے بری خبر یہ لگ رہی ہے کہ محمد عامر کے پیچھے پیچھے شاید حسن علی، وہاب ریاض اور جنید خان بھی ٹیسٹ کرکٹ سے ریٹائرمنٹ دیدیں گے اور پھر پاکستان کی طرف ٹیسٹ کرکٹ کون کھیلے گا۔ یوٹیوب پر جاری کردہ ویڈیو میں گفتگو کرتے ہوئے شعیب اختر نے کہا کہ
محمد عامر کے پیچھے پیچھے شائد حسن علی، وہاب ریاض اور جنید خان بھی ٹیسٹ کرکٹ سے ریٹائرمنٹ دیدیں گے۔آپ نے دیکھا ہو گا کہ میں نے اپنی ویڈیوز میں پہلے بھی کہا تھا کہ یہ سارے کے سارے لڑکے صرف ٹی ٹونٹی کے باﺅلر بننا چاہتے ہیں اور بنیادی طور پر تو انہیں ون ڈے کرکٹ کھیلتے ہوئے بھی موت پڑتی ہے۔ ان کا کہنا تھا کہ یہ پاکستانی ٹیم کیساتھ کیا ہو رہا ہے اور یہ لڑکے کیا کر رہے ہیں۔ پاکستان نے محمد عامر پر اتنی سرمایہ کاری کی، میچ فکسنگ سے نکال کر واپس لائے اور کھلانے کی کوشش کر رہے ہیں، اب وہ اچھی فارم میں واپس آیا ہے تو اس کے بعد وہ ریٹائرمنٹ دے رہا ہے، یہ میری سمجھ سے بالاتر ہے۔انہوں نے مزید کہا کہ یہ لڑکے خوش قسمت ہیں کہ میرے جیسا کوئی بندہ بورڈ میں نہیں کیونکہ اگر میں بورڈ میں ہوتا تو پاکستان کیلئے کھیلنے سے انکار کے بعد انہیں کسی بھی جگہ کھیلنے نہ دیتا کیونکہ سب سے پہلے پاکستان ہے، ٹھیک ہے کہ پیسے بھی بنانے ہیں لیکن اس وقت آپ کی پاکستان کو ضرورت ہے اور اگر یہی سلسلہ چلتا رہا تو پاکستان کرکٹ نے کیا ترقی کرنی ہے کہ ایک 27 سال کے باﺅلر نے ٹیسٹ کرکٹ سے ریٹائرمنٹ لے لی
ہے۔ خیال رہے کہ گزشتہ روز محمد عامر نے بھی ٹیسٹ کرکٹ سے ہمیشہ کے لیے اعلان کر دیا تھا جس کے بعد یہ بھی کہا جا رہا ہے کہ انہوں نے برطانیہ میں مستقل سکونت اختیار کرنے کے لیے ایسا قدم اٹھایا ہے.
