تبدیلی کے نام پر عوام سے مذاق کیا جا رہا ہے سی پیک کےخلاف بھی خوفناک سازشیں کی جا رہی ہیں مسخرہ باز پارٹی کو آگے لانے سے یہی ہونا تھا مولانا فضل الرحمان بہت کچھ کہہ گئے
قلات (آئی این پی)متحدہ مجلس عمل کے سربراہ اور قائد جمعیت مولانا فضل الرحمان نے کہا ہی کہ تبدیلی حکومت عوام کے ساتھ مذاق کے سوا ملک کی ترقی کے لیئے کچھ بھی نہیں کررہی ہے، پاکستان کی سیاست میں 25 جولائی جیسے دھاندلی زدہ انتخابات کبھی نہیں دیکھے، پاکستان کو ترقی سے روکنے کے لیئے مغربی طاقتیں سی پیک اور پاکستان کی ترقی کے خلاف سازشیں کررہی ہیں‘ ملک کے نوجوان طبقہ اور قوم کی رہنمائی کے لیئے علمائے کرام کو اپنی ذمہ داری نبھانا ہوگی۔مرکز اسلامی قلات میں عوامی اجتماع سے خطاب کرتے ہو ئے ایم ایم اے سربراہ مولانا فضل الرحمان نے حکومت پر مزید تنقید کرتے ہوئے کہا کہ تبدیلی حکومت نے منی بجٹ کے زریعے قوم پر مہنگائی کا طوفان مسلط کر کے نئے ٹیکسوں کے انبار لگائے دیئے ہیں،اور روپے کی گرتی ہوئی قدر سے مہنگائی میں بے پناہ اضافہ ہو گیا ہے، انہوں نے کہا کہ مغربی طاقتیں سی پیک کو سبوتاثر کرنے کے کوشیش کررہی ہیں جسے ہم کبھی بھی کامیاب نہیں ہو نے دیں گے،مغربی طاقتیں نہیں چاہتیں کہ سی پیک کامیاب ہو اور پاکستان ترقی کی راہ پر گامزن ہو سکے۔ انہوں نے مزید کہا کہ امریکہ سی پیک کے خلاف سازشوں میں مصروف ہے،بد قسمتی سے ملک کے عظیم ترقی کے پروگرام سی پیک کو ناکام بنانے کے لیئے پی ٹی آئی جیسی مسخرہ باز پارٹی کو آگے لایا گیا ہے،جس کی وجہ سے اب مہنگائی کے ہاتھوں عوام کی چیخیں نکل گئی ہیں۔مولانا فضل الرحمان کا کہنا تھا کہ ملک میں دینی جماعتوں کو کمزور کر نے کے لیئے فرقہ پرست تنظیمیں بنائی گئی ہیں، ملک کو موجودہ حالات سے نکالنے کے لیئے اپوزیشن کے تمام جماعتوں کو مل کر جدوجہد کرنی چاہئیے۔.
