لاہور(نیوز ڈیسک) نیب لاہور نے کاروائی کرتے ہوئے عاشیانہ ہاؤسنگ سکیم میں کرپشن پر شہباز شریف کو گرفتار کر لیا لیکن حمزہ شہباز اس وقت کیا کر رہے ہیں؟ انہوں نے قانونی ماہرین سے رابطے شروع کر دیئے ہیں۔’’ جیونیوز“ کے مطابق شہباز شریف کی گرفتاری کے بعد ان کے بیٹے اور
پنجاب میں اپوزیشن لیڈر حمزہ شہبازشریف نے ماہر قوانین سے ملاقاتیں شروع کر دی ہیں۔حمزہ شہباز کے ساتھ قانونی ماہرین کی ملاقاتیں ایچ بلاک ماڈل ٹاؤن میں ہو رہی ہیںَ جبکہ ان ملاقاتوں میں سلمان شہباز بھی موجود ہیں۔ان ملاقاتوں کا مقصد شہباز شریف کی گرفتاری کے بعد کی جانے والی قانونی چارہ جوئی ہے۔ کیونکہ نیب کی جانب سے جو اعلامیہ جاری کیا گیا ہے اس میں کہا گیا ہے کہ نیب کل شہباز شریف کو عدالت میں پیش کریں گے۔ شہباز شری کی گرفتاری پر (ن) لیگ نے رد عمل دیتے ہوئے کہا کہ اسپیکر قومی اسمبلی اسد قیصر کی اجازت کے بغیر اپوزیشن لیڈر شہباز شریف کی گرفتاری قانون شکنی ہے ، جس لیڈر کے کام کی وجہ سے ترکی اور چین کے چرچے ہیں آج انہیں ہی گرفتار کر لیا گیا ہے۔ دوسری جانب شہباز شریف کی گرفتاری پر پیپلز پارٹی کے رہنماء خورشید شاہ نے رد عمل دیتے ہوئے کہا کہ کہ شہبازشریف کی اس انداز میں گرفتاری پارلیمان کی توہین ہے۔شہبازشریف قائد حزب اختلاف ہیں اس طرح گرفتارنہیں کرنا چاہیے۔ خورشید شاہ نے کہا کہ سیاسی قیادت کے تمام مقدمات پرپارلیمنٹ کو پہلے اعتماد میں لیا جائے۔پارلیمانی کمیٹی میں تمام مقدمات کا جائزہ لیا جائے۔
انہوں نے کہا کہ اس طرح کی گرفتاریوں سے سیاسی انتقام کی بوآتی ہے۔حکومت انتقامی کارروائیوں سے گریزکرے۔ انہوں نے کہا کہ 100 روزہ پروگرام کی ناکامی پرحکومت ایسے قدم اٹھا رہی ہے۔دوسری جانب سابق پرنسپل وزیراعظم فواد حسن فواد آشیانہ ہاؤسنگ اسکیم کیس میں وعدہ معاف گواہ بن گئے ہیں، فواد حسن فواد نے آشیانہ میں کرپشن کا سارا ملبہ شہبازشریف پرڈال دیا ہے،غیرقانونی ٹھیکوں کا الزام شہبازشریف پرلگا دیا ۔ ترجمان نیب کا کہنا ہے کہ شہبازشریف کو کل احتساب عدالت میں پیش کیا جائے گا، شہبازشریف کا آشیانہ ہاؤسنگ اسکیم کیس میں 14روزہ جسمانی ریمانڈ لیے جانے کا امکان ہے۔نیب نے قائد حزب اختلاف شہبازشریف کی گرفتاری سے متعلق اسپیکر قومی اسمبلی کوآگاہ کردیا ہے،رولز کے تحت اسمبلی ممبر کی گرفتاری سے پہلے اسپیکر قومی اسمبلی سے اجازت لی جاتی ہے۔اس سے قبل نیب نے سابق وزیراعلیٰ اورقومی اسمبلی میں اپوزیشن لیڈر شہبازشریف کو آج صاف پانی کمپنی کیس کی تحقیقات کیلئے طلب کیا تھا۔اور انہیں آشیانہ ہاؤسنگ اسکیم میں گرفتار کرلیا۔شہبازشریف جب 3 بجے نیب آفس پہنچے توان کے سامنے تین فائلیں رکھی گئیں اور ان سے پوچھ گچھ کی گئی۔ بتایا گیا ہے کہ نیب آفس میں پہنچنے کے بعد شہبازشریف کی گاڑیاں واپس بھیج دی گئیں ۔جبکہ نیب آفس کے باہر رینجرز کی بھاری نفری تعینات کردی گئی۔ اطلاعات ہیں کہ نیب نے شہبازشریف کوآشیانہ ہاؤسنگ اسکیم میں کرپشن کے الزام میں حراست میں لے لیا ہے۔
