بھارت نے ورلڈ کپ میں پاکستان کرکٹ ٹیم کو خصوصی سیکیورٹی دینے سے انکار کردیا۔ بھارتی میڈیا رپورٹس کے مطابق وزارت خارجہ کے ترجمان ارندم باگچی کا کہنا ہے کہ ورلڈ کپ میں پاکستان کے ساتھ خصوصی برتاؤ نہیں کیا جائے گا، میگا ایونٹ میں پاکستان کو وہی سہولتیں دی جائیں گی جو دوسرے ملکوں کی ٹیموں کو حاصل ہوگی۔ انہوں نے کہا کہ پاکستان ٹیم کیلئے کوئی “اسپیشل ٹریٹمنٹ” نہیں ہوگی البتہ جہاں درکار ہوا وہاں مکمل فول پروف سکیورٹی کوور دیا جائے گا۔
واضح رہے کہ گزشتہ ہفتے حکومت کی جانب سے قومی ٹیم کو ورلڈکپ کیلئے بھارت جانے کی اجازت دی گئی تھی۔ دفتر خارجہ کا کہنا تھا کہ پاکستان کا ہمیشہ مؤقف رہا ہے کہ کھیل اور سیاست علیحدہ ہے اور پاک بھارت تعلقات انٹرنیشنل اسپورٹس کی راہ میں حائل نہیں ہونے چاہیے البتہ پاکستان کو بھارت میں سکیورٹی پر تحفظات برقرار ہیں، آئی سی سی اور بھارتی حکومت کو تحفظات سے آگاہ کریں گے، امید ہے بھارت میں پاکستان ٹیم کو بھرپور سکیورٹی حاصل ہوگی۔ یاد رہے کہ بھارت میں اکتوبر سے شروع ہونے والے ورلڈ کپ میں پاکستان اپنا پہلا میچ 6 اکتوبر کو نیدرلینڈز کے خلاف کھیلے گا۔
