اسلام آباد : وزیر داخلہ رانا ثناء اللہ خان نے کہا ہے کہ ڈاکٹر شیریں مزاری کا بیان قابل مذمت اور لاقانونیت کی انتہا ہے،شیریں مزاری کے ٹویٹ پر قانونی کارروائی کریں گے،شیریں مزاری کا بیان قانونی کارروائی کے لئے ایف آئی اے کو بھجوا دیا گیا ہے۔ اتوار کو اپنے بیان میں رانا ثنا اللہ نے کہا کہ پولیس افسران کے خلاف جھوٹ بول کر عوام کو اکسانا جرم ہے،سوشل میڈیا پر پولیس سمیت اداروں کے خلاف پراپیگنڈہ، جھوٹ، جعلی وڈیوز پر آپریشن کلین اپ کریں گے،فرض شناس افسران اور پولیس کے خلاف دہشت پھیلانا اور عوام کو بھڑکانا جرم ہیں۔ اس جرم میں ملوث عناصر کے خلاف کارروائی کی ہدایت کر دی ہے ،فارن ایجنٹ ریاست کے خلاف کھل کر سامنے آچکے ہیں، انجام کو پہنچائیں گے۔