اسلام آباد: پاکستان تحریک انصاف کے سابق رہنما اور وفاقی وزیر فیصل واوڈانے کہا ہے کہ انتخابات دور دور تک نظر نہیں آ رہے اور عمران خان بھی الیکشن نہیں چاہتے۔انہوں نے کہا کہ عمران خان کو اب بھی نہیں معلوم کے ان کے مشیر ان سے کیا کام کروا رہے ہیں، ہمیشہ کھل کر خان صاحب کو کہتا تھا کہ فلاں بے ایمان ہے،کرپٹ ہے، عمران خان کےقریب سانپ،جو2خاص ہیں انھیں ان سےزندگی کے لالے پڑ سکتے ہیں۔
جیو نیوز کے پروگرام میں ان کا کہنا تھا پاکستان میں عمران خان کو کسی سے ایک فیصد بھی خطرہ نہیں ہے لیکن عمران خان جو بار بار کہہ رہے ہیں کہ یہ لوگ مجھے مارنا چاہتے ہیں تو کوئی بھی ملک اس سے فائدہ اٹھا سکتے ہیں۔زمان پارک اور جوڈیشل کمپلیکس اسلام آباد میں ہونے والے واقعات کے حوالے سے فیصل واوڈا کا کہنا تھا پی ٹی آئی میں کبھی مار دھاڑ نہیں تھی اور ہم سب اس چیز کے خلاف تھے، ہم الطاف حسین کی دہشت گردی کے خلاف کھڑے ہوئے تھے آج ہم وہی کر رہے ہیں۔ ایک سوال کے جواب میں فیصل واوڈا کا کہنا تھا پی ٹی آئی کو اسٹیبلشمنٹ لائی تھی جس طرح مسلم لیگ ن اور دیگر جماعتوں کو لائی تھی۔سابق وفاقی وزیر کا کہنا تھا یہ ناممکن ہے کہ کوئی اسٹیبلشمنٹ کی سپورٹ کے بغیر پاور میں آجائے۔
