اسلام آباد : سرکاری ملازمین کی تنخواہوں اور پنشن میں توقع سے زیادہ اضافہ ہونے کا امکان، سرکاری ملازمین کی تنخواہوں اور ریٹائرڈ سرکاری ملازمین کی پنشن میں 20 فیصد تک اضافہ کیے جانے کا قوی امکان، بجٹ 12 جون کو پیش کیا جائے گا۔ تفصیلات کے مطابق پاکستان تحریک انصاف کی حکومت 12 جون کو نیا بجٹ پیش کرے گی ، جس کا حجم 7ہزار600 ارب روپے ہوگا۔ سرکاری ملازمین کی تنخواہوں اور پنشن میں اضافے کے حوالے سے ذرائع کا بتانا ہے کہ آئندہ مالی سال کے بجٹ میں سرکاری ملازمین کی تنخواہوں میں 20 فیصد اضافے کا امکان ہے اور ریٹائرڈ سرکاری ملازمین کی پنشن میں بھی اضافہ متوقع ہے۔ وزارت خزانہ میں سرکاری ملازمین کی تنخواہوں میں اضافے کی مختلف تجاویز زیرغور ہیں۔
ابتدا میں 20 فیصد سے 50 فیصد تک اضافے کی مختلف تجاویز دی گئی لیکن کورونا کے باعث ملکی معاشی صورتحال کے مدنظر سرکاری ملازمین کی تنخواہوں میں 20 فیصد اضافے کی تجویز پر غور کیا جارہا ہے۔یہ بھی معلوم ہوا ہے کہ ریٹائرڈ سرکاری ملازمین کی پنشن میں 20 فیصد تک اضافہ متوقع ہے۔ بجٹ کے حوالے سے بتایا گیا ہے کہ شرح نمو کا ہدف 3 فیصد رکھنے کی تجویز زیر غور ہے۔ کورونا وائرس کی وبا کے باعث تمام اہداف کو کم رکھنے کا فیصلہ کیا گیا ہے۔ دوسری جانب قرضوں اور سود کی ادائیگی پر 3 ہزار 2 سو ارب روپے خرچ کئے جائیں گے۔جبکہ دفاعی بجٹ میں 10 فیصد اضافے کی تجویز پر غور کیا جا رہا ہے۔ جس کے بعد دفاعی بجٹ کیلئے ایک ہزار 4 سو ارب روپے مختص کئے جا سکتے ہیں۔ میڈیا رپورٹ کے مطابق سبسڈیز اور پنشن ادائیگی کیلئے 700 ارب مختص کئے جا سکتے ہیں۔ اور ایف بی آر کیلئیٹیکس اہداف 51 سو ارب روپے کا ہدف مقرر کیا جا رہا ہے۔ جبکہ 460 ارب روپے وفاقی حکومت کے اخراجات کیلئے مختص کرنے کا فیصلہ کیا گیا ہے۔ آئندہ مالی سال کے بجٹ کیلئے تجاویز و سفارشات کی تیاری کا کام تیز کر دیا گیا ہے۔ بجٹ 12جون کو پیش کیاجائے گا۔
