لاہور چیمبر کے صدر عرفان اقبال شیخ، سینئر نائب صدر علی حسام اصغر اور نائب صدر میاں زاہد جاوید احمد نے حکومت سے اپیل کی ہے کہ کم از کم تین ماہ کے لیے صارفین کے بجلی اور گیس کے بلز معاف کرے جبکہ پراپرٹی مالکان سے بھی اپیل کی ہے کہ وہ موجودہ حالات کے پیش نظر اپنے کرایہ داروں کو دو ماہ کے لیے کرایہ کی چھوٹ دے دیں۔ ایک بیان میں لاہور چیمبر آف کامرس اینڈ انڈسٹری کے عہدیداروں نے کہا کہ کروناوائرس کی وجہ سے ملک بھر میں غیرمعمولی تجارتی و معاشی صورتحال پیدا ہوئی ہے، کاروباری سرگرمیاں نہ ہونے کے برابر ہیں ،
ایکسپورٹ آرڈرز کینسل ہورہے ہیں جبکہ مارکیٹوں میں گاہک نہیں ہے، ایسے میں اگر حکومت انہیں یوٹیلٹی بلز میں تین ماہ کی چھوٹ دے دیتی ہے تو یہ بہت بڑا ریلیف ہوگا، انہوں نے توقع کی کہ پراپرٹی مالکان بھی جذبہ خدمت کا اظہار کرتے ہوئے اپنے کرایہ داروں کو کرایہ میں دو ماہ کی چھوٹ دیں گے۔ انہوں نے مزید کہا کہ حکومت میرج ہالوں کو وقتی طور پر قرطینہ میں تبدیل کردے اور بدلے میں انہیں دو سال کے لیے ٹیکسوں کی چھوٹ دے دے، اس طرح اجتماعی کوششیں کرکے اس مشکل وقت کو ٹالا جاسکتاہے۔ لاہور چیمبر کے عہدیداروں نے یہ توقع بھی ظاہر کی کہ حالات کے پیش نظر لاہور چیمبر کے ممبران کو تجدید رکنیت کے لیے اضافی وقت دے دیا جائے گا۔
