اسلام آباد: وزیرخارجہ شاہ محودقریشی نے ایران میں کورونا وائرس سے ہونے والے کثیر جانی نقصان پر گہرے دکھ اور افسوس کا اظہار کرتے ہوئے کہاہے کہ ایران کی حکومت اور عوام جس بہادری اور جوانمردی سے اس عالمی وبا کا مقابلہ کر رہے ہیں وہ یقیناً قابل تحسین ہے ۔ یہ بات انہوں نے اتوار کو ایران کے وزیر خارجہ جواد ظریف سے ٹیلیفون پر گفتگو کے دوران کہی ہے۔ بات چیت میں کرونا کے عالمی وبا کے حوالے سے تبادلہ ء خیال کیا گیا۔ وزیر خارجہ نے اپنے ایرانی ہم منصب کو، اس کڑے وقت میں ایران پر عائد پابندیوں کے خاتمے کے حوالے سے وزیراعظم عمران خان اور پاکستان کی طرف سے، عالمی سطح پر کی جانے والی کاوشوں سے آگاہ کیا۔ انہوں نے ایرانی وزیرخارجہ کو بتایا کہ کہ ان کی کل جرمنی کے وزیر خارجہ سے بات ہوئی اورہماری درخواست پر انہوں نے وعدہ کیا کہ کل یورپی یونین کے وزرائے خارجہ اجلاس میں وہ اس معاملے کو اٹھائیں گے ۔
وزیرخارجہ نے کہاکہ انہوں نے ان سے یہ بھی مطالبہ کیا کہ اس عالمی وبا کو پیش نظر رکھتے ہوئے، قرض کے بوجھ تلے دبے ، ترقی پذیر ممالک کو قرضوں کی ادائیگی میں سہولت فراہم کی جائے تاکہ وہ اپنے وسائل کو اس وبا سے نبرد آزما ہونے کیلئے بروئے کار لا سکیں ۔ وزیرخارجہ نے کہاکہ وہ سارک وزرائے خارجہ سے بھی ابھی رابطہ کر کے انہیں ایران پر عائد پابندیوں کے خاتمے کے حوالے سے بات کریں گے۔ ہم نے اسلام آباد میں پی فائیو ممالک کے سفراء سے بھی گذارش کی ہے کہ وہ اپنے اپنے ممالک کو یہ پیغام پہنچائیں کہ انسانی ہمدردی کے تحت ایران پر عائد معاشی پابندیوں کو ہٹایا جائے ۔ وزیرخارجہ نے کہاکہ پاکستانی زائرین جو ایران سے بذریعہ تفتان واپس آ رہے ہیں ہم نے ان کو آئسولیش میں رکھنے کیلئے سکھر اور ملتان میں قرنطینہ مراکز قائم کیے ہیں ۔ ایرانی وزیرخارجہ نے کہاکہ صدر روحانی کی ہدایت پر زائرین کی طبی سہولت کیلئے ہفتہ کو دو ہسپتالوں کو بارڈر ایریا میں مختص کیا گیا ہے یہ زائرین ہمارے مہمان ہیں ہم ان کی خدمت کو اپنا فرض سمجھتے ہیں ۔ ایرانی وزیر خارجہ جواد ظریف نے ایران پر پابندیاں ہٹوانے کے حوالے سے پاکستان کی طرف سے کی جانے والی بھرپور کاوشوں پر وزیر اعظم عمران خان اور وزیر خارجہ مخدوم شاہ محمود قریشی کا شکریہ ادا کرتے ہوئے کہا کہ کہ پاکستان نے برادر ملک ہونے کے ناطے، اس کڑے وقت جو کردار ادا کیا ہے وہ مثالی ہے۔
