لاہور(ویب ڈیسک)قومی ٹیم کے چیف سلیکٹر انضمام الحق نے اپنے تین سالہ دور میں6 کروڑ روپے سے زائد رقم وصول لی مگر اپنے دعوے کے برخلاف پاکستان کرکٹ کو زیادہ نیا ٹیلنٹ نہ دے سکے۔انضمام الحق نے اپریل 2016 ءمیں چیف سلیکٹر کی ذمہ داری سنبھالی اور ورلڈکپ کے پیش نظر ان کے معاہدے میں 3ماہ کی توسیع ہوئی، انھیں 12 لاکھ روپے ماہانہ تنخواہ کے ساتھ دیگر مراعات دی گئیں، معاہدے کے تحت انضمام کو ٹیم کی کسی سیریز میں فتح پر معاوضے کا 25 فیصد اور آئی سی سی ایونٹ جیتنے پر 100 فیصد حصہ ملتا تھا۔چیمپئنز ٹرافی2017ءکی کامیابی پر انھیں حکومت سے بھی ایک کروڑ روپے کی انعامی رقم ملی تھی،
ایک محتاط اندازے کے مطابق تقریباً6 کروڑ روپے سے زائد ان کے اکاؤنٹ میں منتقل ہوئے۔انضمام الحق کا دور متنازع بھی رہا کیو ں کہ دیگر سلیکٹرز توصیف احمد، وجاہت اللہ واسطی اور وسیم حیدر کی حیثیت ڈمی جیسی تھی، انضمام پر سب سے زیادہ تنقید بھتیجے امام الحق کو دیگر کھلاڑیوں پر فوقیت دےکر قبل از وقت قومی ٹیم میں شامل کرنے پر ہوئی، ان پر الزام لگتے رہے کہ وہ امام کا کیریئر بنانے کیلئے مختلف جوڑتوڑ کرتے رہے۔ان پر فواد عالم اور خرم منظور سمیت کئی کرکٹرز کے کیریئر تباہ کرنے کا الزام بھی عائد ہوا، وہ کئی کھلاڑیوں کو مواقع دینے کا دعویٰ کرتے ہیں مگر ان میں سے زیادہ تر پی ایس ایل میں ہی نمایاں ہو چکے تھے،ان کے تین سالہ دور کے بعد بھی ٹیم کو اب بھی اوپننگ، سپن اور آل راؤنڈرز کے شعبے میں مشکلات کا سامنا ہے۔انضمام گرین شرٹس کے ہر اہم غیرملکی دورے میں جانے پربھی تنقید کی زد میں آئے، ورلڈکپ میں بھارت کیخلاف میچ تک انضمام ٹور سلیکشن کمیٹی کا حصہ رہے جس سے کپتان اور کوچ ناخوش تھے، ٹیم کے ٹریننگ سیشنز میں کھلاڑیوں کو ان کے مشورے بھی کوچنگ سٹاف کو ایک آنکھ نہ بھائے،اس دورے میں انھیں 500ڈالر یومیہ دیے گئے۔گزشتہ روز پریس کانفرنس کے دوران انھوں نے ورلڈکپ میں شکست پر کپتان سرفراز احمد کی طرح قوم سے معذرت نہیں کی بلکہ ٹیم کی کارکردگی کو اچھا قرار دیتے رہے،اب وہ کسی اور پوسٹ کو پانے کیلئے کوشاں ہیں اورپی سی بی نے انھیں اس حوالے سے کوئی آس بھی دلا دی ہے۔
