اسلام آباد (مانیٹرنگ ڈیسک) معروف صحافی اور اینکر ڈاکٹر عامر لیاقت کی تحریک انصاف میں شمولیت پارٹی کے کئی دیرینہ کارکنوں کو ایک آنکھ نہ بھائی ۔کچھ رہنمائوںنے عامرلیاقت کو قبول کرنے پر اپنی پارٹی قیادت پر تنقید کی تو کچھ رہنما ایسے بھی تھے جو پارٹی سے کنارہ کش بھی ہو گئے۔ ان میں سے ایک گلوکار سلمان احمد تھے جنھوںنے باضابطہ طور پر

پارٹی سے علیحدگی کا اعلان کر ڈالا۔ جس کے بعد عمران خان نے ان سے باضابطہ طور پر رابطہ کرکے انھیں اعتماد میں لیا اور پارٹی کےلئے اپنی خدمات جاری رکھنے کی درخواست کی۔ سلمان احمد نے عمران خان کو اپنی حمایت جاری رکھنے کی یقین دہانی کرا دی اور ساتھ میں وہ وجہ بھی بیان کر ڈالی جس کے تحت انھوںنے عامر لیاقت کی پارٹی میں شمولیت پر احتجاج کیا تھا۔ سلمان احمد کا کہناہے کہ میں نے جو احتجاج کیا اس میں میں نے نکتہ اٹھایا تھا کہ عامر لیاقت حسین کو اگر پی ٹی آئی میں شامل ہو کر سیاستدان کی حیثیت سے ایک پلیٹ فارم مل رہا ہے، میں ان کو یاد دلا دوں کہ انہوں نے دین کو توڑ مروڑ کر میرے دوست شہید جنید جمشید پر مبینہ توہین مذہب اور توہین رسالت کا الزام عائد کیا۔انہوں نے جنید جمشید کی والدہ کے لیے نازیبا الفاظ استعمال کیے۔ انہوں نے ایسا کر کے کروڑوں لوگوں کے دلوں کو ٹھیس پہنچائی جن میں میں بھی شامل ہوں۔ اگر آپ ایسے ویسے لوگوں کو تحریک انصاف میں لے کر ان کو پلیٹ فارم دینا چاہتے ہیں تو اس پر میں نے اپنا احتجاج ریکارڈ کیا ، میں نے خان صاحب سے کہا کہ دین کو اتنے لوگوں نے غلط استعمال کر کے نفرتیں پھیلائی ہیں۔مجھے یقین ہے کہ عمران خان میرے تحفظات پر سنجیدگی سے غور کر رہے ہوں گے کیونکہ دین کو سیاست یا سیاسی مقاصد کے لیے استعمال کرنا ، لوگوں کو نفرت کا نشانہ بنانا قابل مذمت ہے اور ہمیں ایسے لوگوں سے بچنا چاہئیے۔ میری عمران خان سے بہت واضح بات ہوئی ہے ، میں نے ان سے کبھی کوئی چیز نہیں مانگی ، میں ایک پاکستانی ہوں، فنکار ہوں ، میں نے ان سے کہا کہ ہم جیسے لوگ جو آپ کو 35 سال سے سپورٹ کر رہے ہیں اگر آپ چاہتے ہیں کہ ہم آگے بھی آپ کو سپورٹ کریں تو آپ کو بھی ہمارے احتجاج کے نکتے پر غور کریں ۔ یاد رہے کہ عامر لیاقت کی پی ٹی آئی میں شمولیت پر گلوکار و فنکار سلمان احمد نے مائیکروبلاگنگ ویب سائٹ ٹویٹر پر اپنے پیغام میں عمران خان سے ناراضگی کا اظہار کیا تھا۔